काठमाडौं (हाम्रो खेलकुद) – युनाइटेड अरव इमिरेट्स (युएई) ले नेपालसँग लगातार तीन खेलमा हार व्यहोरेपछि मुख्य प्रशिक्षक रोविन सिंहलाई पदबाट हटाएको छ । पछिल्लो समय लगातार खराब प्रदर्शन गर्दै ओडिआई मान्यता नै संकटमा पुर्याएपछि रोविन सिंहलाई युएईले पदबाट हटाएको छ ।

युएईले शुक्रबारदेखि नामिबियामा सुरु हुने प्लेअफ क्वालिफायरको लागि पाकिस्तानका पूर्वस्टार अलराउन्डर मुदास्सर नाजरलाई कार्यवाहक प्रशिक्षकको रुपमा नियुक्त गरेको छ । भारतीय पूर्वअलराउन्डर रोविनसिंह २०२० को फेब्रुअरीमा युएईको निर्देशकमा नियुक्त भएका थिए ।

रोविनले टोलीभित्रै आन्तरिक राजनीति गरेपछि युएईको टोलीमै एकताको कमी भएको थियो । युएईलाई शीर्ष तीनमा रहँदै सोझै आगमी जुन जुलाईमा जिम्बावेमा हुने विश्वकप छनोट खेल्ने अवसर थियो । तर लिग-२ मा युएईले पछिल्ला १५ खेल मध्य तीन खेलमा मात्रै जित हात पारेपछि छैटौं स्थानमा अन्त्य गरेको थियो । जसको कारण सोझै विश्वकप छनोट र ओडिआई मान्यता गुमाएको थियो ।

शुक्रबारदेखि युएई, नामिबिया, पपुवा न्युगिनी, अमेरिका, जर्सी र क्यानडामा हुने प्लेअफ छनोट ओडिआई मान्यता निरन्तरता गर्ने यो अन्तिम मौका हुनेछ । युएईले जर्सी, पपुवा न्युगिनी र क्यानडालाई पछि पार्न सके ओडिआई मान्यता पाउनेछ । अन्यथा चार वर्षको लागि ओडिआई मान्यता गुम्नेछ।

यस सिजनमा युएईले टि२० र ओडिआई गरि कुल २८ खेल खेल्दा २० खेल हारेको छ । नेपालसँग पछिल्ला तीन खेलमा लगातार हार ब्यहोरेको थियो । लिगको सबैभन्दा कमजोर पपुवा न्युगिनीसँग पछिल्ला चार मध्य तीन खेल पनि हार्न पुगेको थियो ।
युएई मार्च १२ मा टियु मैदानमा २ सय ४८ रनको विशाल विजयी लक्ष्य पछ्याउनेक्रममा ७१ रनमा अल आउट भएको थियो ।

जुन युएईको ओडिआई इतिहासकै सर्वाधिक कम योगफल थियो । पछिल्ला तीन खेलमा युएई नेपालसँग ९ रनले डकवर्थ लेविस पद्धति, १ सय ७७ रन र ४२ रनले पराजित भएको थियो । अन्तिम खेलमा आसिफ खानले ४१ बलमै शतक हानेपछि नेपालविरुद्ध ५० ओभरमा ६ विकेट गुमाउँदै ३ सय १० रन बनाएको थियो ।

जितको लागि ३ सय ११ रनको विजयी लक्ष्य पछ्याएको नेपाल ४४ ओभरमा ६ विकेट गुमाउँदै २ सय ६९ रन बनाउँदा ब्याड लाइटर कट अफ टाइमको कारण नेपाल डकवर्थ लेविस पद्धतिको आधारमा ९ रनले विजयी भएको थियो । त्यस्तै घरेलु मैदान दुबईमा नेपालले दिएको २ सय ३० रनको विजयी लक्ष्य पछ्याउनेक्रममा ९४-१ को अवस्थाबाट १ सय ८७ रनमा अल आउट भएको थियो ।

युएईले पछिल्ला १० खेलमा दुई खेलमा मात्रै २ सय रन कटाएको थियो । पपुवा न्युगिनीलाई अन्तिम खेलमा ६ विकेटले हराउनेक्रममा २ सय ३५ रनको लक्ष्य ३८.४ ओभरमा ४ विकेट गुमाउँदै पूरा गरेको थियो । उक्त खेलमा मोहम्मद वासिमले ६१ बलमै शतक हानेका थिए । नेपाललाई युएईले पछिल्लो खेलमा २ मार्चमा ६८ रनले हराएको थियो ।

२ सय ८ रनको विजयी लक्ष्य पछ्याएको नेपाल १ सय ३७ रनमा अल आउट भएको थियो । त्यसपछि नेपालले युएईमाथि सानदार प्रदर्शनका साथ लगातार तीन जित हात पारेको थियो । युएई पपुवा न्युगिनीसँग घरेलु मैदान दुबईमा ९५ रनमा अल आउट भएको थियो ।

रोविन मुख्य प्रशिक्षक हुँदा युएईले लगातार हार, खराब ब्याटिङ, लगातार ब्याटिङक्रम परिवर्तन र टिम सन्तुलन भद्रगोल बनाएको थियो । युएइले शुक्रबारदेखि नामिबियामा सुरु हुने आइसिसी प्लेअफ क्वालिफायर खेल्ने १४ सदस्य टोली घोषणा गर्दा चार खेलाडी परिवर्तन गरेको छ ।

युएईको टोलीबाट पूर्वकप्तान सिपी रिजवान, हजरत बिलाल, अश्वन्ता वल्थपा र जवार फरिद बाहिरिएका छन् । युएईका अनुभवी ब्याटर रमिज शहजाद पाँच वर्षपछि युएईको ओडिआई टोलीमा फर्किएका छन् ।

३५ वर्षीय रमिजले १५ ओडिआई खेलमा २ शतक र ४ अर्धशतकसहित कुल ६ सय ९१ रन बनाएका छन् । उनले २०१८ मा स्कटल्यान्डविरुद्ध १ सय २१ र वेस्टइन्डिजविरुद्ध १ सय १२ रनको सानदार शतकीय इनिङ खेलेका थिए ।

मध्यक्रममा खराब प्रदर्शनपछि उनलाई टोलीमा बोलाएकोछ । उनलाई बोलाउँदा मध्यक्रममा राम्रो प्रदर्शन गर्ने अपेक्षा गरेको छ । रमिजले घरेलु क्रिकेटमा पनि सानदार प्रदर्शन गर्दै आएका छन् । उनको ओडिआईमा औसत रन ५३.१५ छ ।

२१ वर्षीय तीव्र गतिका बलर सन्चित शर्मालाई पनि टोलीमा बोलाएको छ । अर्का २१ वर्षीय भारतीय मुलका अंश टन्डनलाई पनि टोलीमा बोलाएको छ । टन्डन पनि तीव्र गतिका बलर हुन् । मतिउल्लाहलाई पनि टोलीमा राखेको छ । तीव्र गतिका बलर मतिउल्लाह खान पहिलो पटक युएईको टोलीमा परेका हुन् ।

लिग २ बाट नेपाल, स्कटल्यान्ड र ओमान शीर्ष तीनमा रहँदै आगमी जुन जुलाईमा जिम्बावेमा हुने विश्वकप छनोटमा सोझै स्थान बनाएका थिए । नेपालले १२ मध्य ११ खेलमा जित हात पार्दै सोझै ओडिआई मान्यता पाउनुको साथै विश्वकप छनोटमा पुगेको थियो ।

६ टोली सहभागी प्लेअफमा सिंगल राउन्ड रोविनबाट हुने प्रतियोगितामा शीर्ष दुई टोलीले जिम्बावेमा हुने विश्वकप छनोट खेल्न पाउनेछन् । युएईले प्लेअफमा पहिलो खेल २७ मार्चमा पपुवा न्युगिनीसँग खेल्नेछ ।

३० मार्चमा अमेरिका, १ अप्रिलमा क्यानडा, २ अप्रिलमा नामिबिया र ५ अप्रिलमा जर्सीसँग खेल्नेछ । यसै प्रतियोगिताले युएईको आगमी चार वर्षको भविष्य निर्धारण गर्नेछ ।

प्लेअफ खेल्ने युएईको टोली :

मोहम्मद वासिम (कप्तान), आयन खान, अंश टन्डन, आर्यन लाक्रा, आसिफ खान, अर्यांश शर्मा, जुनैद सिद्दिक, कार्तिक मयाप्पन, मतिउल्लाह खान, रमिज शाहजद, रोहन मुस्तफा, सन्चित शर्मा, वृत्य अरविन्द र जहुर खान ।