काठमाडौं (हाम्रो खेलकुद) – एसियाली खेलकुद (एसियाड) र दक्षिण एसियाली खेलकुद (साग) का पदक विजेता तेक्वान्दो खेलाडी सविता राजभण्डारी र कांस्य विजेता किशोर श्रेष्ठ शनिबार सम्मानित भएका छन् ।

नेपाल तेक्वान्दो संघ बागमती प्रदेशले उनीहरुको सफलताको कदर गर्दै सम्मान गरेको हो । दुबैले साढे दुई दशक अघि एसियाडमा सफलता प्राप्त गरेका थिए ।

श्रम, रोजगार तथा सामाजिक सुरक्षा मन्त्री शरतसिंह भण्डारी, बागमती प्रदेशका सांसद् मीनकृष्ण महर्जन र हरिप्रभा खड्गी (श्रेष्ठ), नेपाल तेक्वान्दो संघ बागमती प्रदेशका अध्यक्ष केशव पुरीलगायतले भनिमण्डलस्थित रामबाघ महलमा आयोजित कार्यक्रममा सविता र किशोरालाई प्रशंसा पत्रसहित सम्मान गरिएको हो ।

सविता र उनका श्रीमान् किशोरले सन् १९९८ मा थाइल्यान्डको बैंककमा भएको एसियाडमा पदक जितेका थिए । सविताले रजत र किशोरले कास्य पदक जितेका थिए । दुबैले १९९९ मा नेपालमा भएको आठौं दक्षिण एसियाली महासंघीय खेलकुद (अहिले दक्षिण एसियाली खेलकुद) का स्वर्ण पदक जितेका थिए ।

एसियाली खेलकुदमा नेपाललाई रजत दिलाउने सविता पहिलो खेलाडी हुन् । त्यसपछि गत असोजमा चीनको हाङझावमा भएको १९ औं एसियाडमा करातेकी एरिका गुरुङले करातेमा रजत पदक जितेकी थिइन् । इन्डोनेसियामा भएको १८ औं एसियाडमा प्याराग्लाइडिङको पुरुष टोलीले टिम इभेन्टमा पनि नेपालले रजत पदक दिलाएको थियो ।

बैंकक एसियाडमा सविता र किशोरसहित ४ खेलाडीले पदक जितेका थिए । तेक्वान्दोकै सपना मल्ल तथा करातेका समरबहादुर गोलेले कांस्य जितेका थिए । सविता र किशोर २००२ मा अमेरिका गएएता पहिलोपटक स्वदेश फर्केका हुन् । उनीहरु बिहीबार अमेरिका प्रस्थान गर्ने बताइएको छ ।