काठमाडौं (हाम्रो खेलकुद) – प्रथम शेर बहादुर देउवा कप राष्ट्रिय कराते प्रतियोगिताको पहिलो दिन नेपाल पुलिस क्लबले तीन स्वर्ण पदक जितेको छ । पुलिसका सोनिम मानन्धरले दोहोरो स्वर्ण हात पारे ।

काताको चार स्पर्धाम पुलिसले ३ र त्रिभुवन आर्मी क्लबले १ स्वर्ण पदक प्राप्त गरे‌ । व्यक्तिगत काता पुरूषमा पुलिसका सोनिम मानन्धरले पहिलो स्थान प्राप्त गरे । उनले ४१ दशमलव ८ स्कोरका साथ स्वर्ण जिते । सशस्त्र प्रहरी बल (एपिएफ) का मनिष कार्की ४० दशमलव ८ स्कोरका साथ दोस्रो भए । लुम्बिनीका वसन्त थारू र आर्मीका विनय लिम्बुले संयुक्तरुपमा तेस्रो स्थान प्राप्त गरे ।

नेपाल पुलिसले नै पुरूष टिम कातामा स्वर्ण जित्यो । सोनिम मानन्धर, फुर्तेन तामाङ र जगत सिंह धानुक सम्मिलित टिमले कुल ४२ स्कोरका साथ स्वर्ण जितेको हो । सोनिमले टिम र व्यक्तिगत दुवैतर्फ स्वर्ण जिते । ४१ दशमलव १ स्कोरका साथ एपिएफ दोस्रो तथा वागमती र सुदुर पश्चिम प्रदेश संयुक्तरुपमा तेस्रो भए ।

महिला व्यक्तिगत कातामा पुलिसकी एलिसा रासकोटी मगरले ४१ दशमलव ८ स्कोरमा स्वर्ण जितिन् । आर्मीकी सानुमाया थिङले ४१ दशमलव ३ स्कोर गर्दे रजत पदक हात पारिन् । एलिसाले पछिल्लो पटक कृष्णप्रसाद स्मृति करातेमा बेहोरेको हारको बदला आज फाइनलमा लिइन् । एपिएफकी सन्जु देसार र कोशी प्रदेशकी सलिना जोशीले कास्य पदक हात पारे ।

महिला टिम कातामा त्रिभुवन आर्मीका सानुमाया थिङ, संगिता मगर र सुनिता सुनार सम्मिलित टिमले स्वर्ण जित्यो । उनीहरूले कुल ४१ दशमलव ८ स्कोर गरे । आर्मीले भन्दा ५ स्कोर कम गरेको सुदुर पश्चिम प्रदेश दोस्रो भयो । सुदुरले ३६ दशमलव ८ स्कोर गरेको थियो । गण्डकी र कोशी प्रदेशले तेस्रो स्थानमा चित बुझाए ।

पहिलो दिन पुरूषतर्फ जुनियर कुमुतेमा दुई तौल समुहमा भएको प्रतिस्पर्धामा एपिएफले दुई स्वर्ण जित्यो । ५५ केजी तौल समुहमा एपिएफका गण्डकीका संगम राना मगरलाई १-० ले हराउँदै स्वर्ण हात पारे ।

महिला ५५ केजी तौल समुहमा पनि एपिएफकी सोनाम शेर्पा सफल रहिन् । उनले फाइनलमा मधेश प्रदेशकी पोरसिया चौधरीलाई पराजित गरिन् । यसअघि उपप्रधान तथा शहरी विकासमन्त्री प्रकाशमान सिंहले प्रतियोगिताको उद्घाटन गरेका थिए ।

यल कराते सितोरियो डोको आयोजना र प्रदेश खेलकुद विकास परिषद, वागमती प्रदेशद्वार प्रायोजित तीन दिने प्रतियोगितामा पुरूषमा ८६ र महिलामा ७५ गरी कुल १ सय ६१ खेलाडीको सहभागीता रहनेछ । पुरूषतर्फ १० र महिलातर्फ ९ गरी १९ स्पर्धामा प्रतिस्पर्धा हुनेछ ।