काठमाडौं –
ओलम्पिक डेको उपलक्ष्यमा नेपाल कुराँस संघले जुनियर कुराँस च्याम्पियनसिप शनिबार आयोजना गर्ने भएको छ । प्रतियोगितामा पुरुष, महिलातर्फ समान ५ गरी जम्मा १० स्वर्णका लागि प्रतिस्पर्धा हुने संघका अध्यक्ष दानबहादुर घिसिङले बिहीबार आयोजित पत्रकार सम्मेलनमा जानकारी गराए ।
करिब ७० खेलाडीको सहभागिता रहने प्रतियोगिता सञ्चालनका लागि झन्डै ४ लाख ७० हजार रुपैयाँ खर्च हुने महासचिव ध्रुवराज न्यौपानेले बताए । प्रतियोगिता धापासीस्थित मेरी गोल्ड हेल्थ क्लबमा हुने छ । ओभरसिज प्रा.लि. को मुख्य प्रायोजन तथा काठमाडौं जिल्ला खेलकुद विकास समितिको सहयोगमा प्रतियोगिता हुने लागेको हो ।
प्रतियोगिताअघि खेल विधि बारे एकदिने प्रशिक्षण पनि हुने छ । प्रतियोगितामा अन्तर्राष्ट्रिय कुराँस संघका निर्णायकको पनि उपस्थिति रहने बताइएको छ । राष्ट्रिय खेलकुद परिषद् (राखेप) को जेठ २५ गतेको निर्णानुसार घिसिङको अध्यक्षतामा संघ गठन भएको थियो ।
