काठमाडौं (हाम्रो खेलकुद) – गण्डकी प्रदेशमा यसै महिना आयोजना हुने नवौं राष्ट्रिय खेलकुदको ट्रफी टुरको पहिलो दिन सुदूरपश्चिम प्रदेशको राजधानी धनगढीमा शनिबार ट्रफी प्रदर्शन गरिएको छ ।

सुदूरपश्चिमका मुख्यमन्त्री त्रिलोचन भट्टले ट्रफी सार्वजनिक गरेका थिए । सो अवसरमा प्रदेशका खेलकुद मन्त्री समेत रहेका गोविन्द बोहेरा, प्रदेश खेलकुद विकास समितिका सदस्य सचिव दिपक सिंह, प्रदेशका ९ जिल्लाबाट छनोट भएका खेलाडी, प्रशिक्षकलगायत खेलप्रेमीको उपस्थिति थियो ।

राष्ट्रिय खेलकुद परिषद् (राखेप)ले गठन गरेको कार्यदलले ट्रफी टुर गराइएको हो । ओलम्पियन दीपक विष्टको संयोजकत्वमा रहेको ५ सदस्यीय कार्यदलमा भलिबल कप्तान अरुणा शाही, अल्ट्रा धाविका मिरा राई, राष्ट्रिय तथा अन्तर्राष्ट्रिय खेलाडी संघका अध्यक्ष दीपक श्रेष्ठ र क्रिकेट टोलीका पूर्व कप्तान पारस खड्का रहेका छन् । खड्का बाहेक चारै जना शनिबारको कार्यक्रममा सहभागी थिए ।

ट्रफी टुरको अघिल्लो दिन शुक्रबार प्रधानमन्त्री निवास बालुवाटारमा प्रधानमन्त्री शेरबहादुर देउवाले ट्रफी सार्वजनिक गरेका थिए । सहभागी ११ मध्ये एनआएनएबाहेक सबै प्रदेश र ३ विभागिय टोली (सेना, प्रहरी र शसस्त्र प्रहरी) बलमा ट्रफी लगिने बताइएको छ । आइतबार ट्रफी टुर लुम्बिनी प्रदेशमा लगिने बताइएको छ । ट्रफीको मायादेवी मन्दिरमा फोटो सेसन गरिने राखेपले जनाएको छ ।

निलेन्द्रराज श्रेष्ठले कल्पना गरेको ट्रफी श्याम तुलाधरसहितको ५ सदस्यीय शिल्पकारले तयार पारेका थिए । ट्रफी ४ सय ५० घन्टामा तयार पारिएको बताइएको छ । जसका लागि ५ केजी चाँदी, २ तोला सुन प्रयोग भएको छ भने त्यसको कुल लागत १० लाख रुपैयाँ रहेको जनाएको छ । त्यसमा नेशनल गेम ट्रफी लेखिएको छ ।

नवौं राष्ट्रिय खेलकुदको ट्रफी टुर

दिन स्थान

असोज १ गते – सुदूरपश्चिम
असोज २ गते- लुम्बिनी
असोज ३ गते- बागमती
असोज ७ गते- त्रिभुवन आर्मी क्लब
असोज ८ गते – प्रदेश १
असोज ९ गते – प्रहरी र सशस्त्र प्रहरी
असोज १३ गते – मधेश प्रदेश
असोज २३ गते – गण्डकी