काठमाडौं (हाम्रो खेलकुद)– खेल पदाधिकारी रहि सकेका मोहन राई र कर्मा छिरिङ शेर्पा नेपाल काँग्रेसको तर्फबाट प्रतिनिधि सभा सदस्य निर्वाचनको समानुपातिकको बन्दसूचीमा परेका छन् ।

मंसिर ४ गते हुने निर्वाचनका लागि कांग्रेसले निर्वाचनमा आयोजनमा बुझाएको १ सय १० बन्द सूचीमा राई र शेर्पा समेटिएका हुन् । काग्रेसको बन्द सूचीमा राईको नाम ३४ औं र शेर्पाको नाम ३६ औं नम्बरमा रहेको छ । संविधान सभा सदस्य समेत रहिसकेका राई राष्ट्रिय खेलकुद परिषद् (राखेप) का पूर्व कोषाध्यक्ष हुन् । त्यसअघि उनी लामो समय राखेप सदस्य रहेका थिए । राई कराते र तेक्वान्दो दुवैका पूर्व अन्तर्राष्ट्रिय खेलाडी हुन् ।

राखेपका पूर्व सदस्य समेत रहेका शेर्पा अखिल नेपाल फुटबल संघ (एन्फा) का निर्वतमान अध्यक्ष हुन् । शेर्पाले भने लामो समय विधार्थी र तरुण दलको राजनीतिमा संलग्न थिए । निर्वाचन क्षेत्र, जिल्ला, प्रदेशको सिफारिस हुँदै कांग्रेसको केन्द्रिय समितिले समानुपातिकको बन्द सुची आयोगमा बुझाएको हो । राई काठमाडौं क्षेत्र नं १ र राई काठमाडौंकै ४ नम्बरबाट सिफारिस भएका थिए ।

आयोगले असोज १० देखि १६ गते सम्मका लागि रानीतिक दलहरुको उम्मेदवारको बन्द सूची संसोधन गर्ने समय तोकेको छ । उम्मेदवारको बन्दसूची अन्तिम रुपमा प्रकाश भने कात्तिक ९ गते हुने निर्वाचन आयोगको कार्यतालिका रहेको छ ।