दिपक बोहरा, पाँचथर
नवौं राष्ट्रिय खेलकुदअन्तर्गत प्रदेश १ को छनोमा पाँचथरले ११ स्वर्ण पदक जितेको छ । प्रदेशबाट पाँचथरका २२ खेलाडी छनोट भएका छन् ।

भदौ २८ गते देखि असोज ८ गतेसम्म प्रदेश छनोटमा पाँचथरले आइ.टि.एफ तेक्वान्दो, फुलकन्ट्रयाक कराते र कुस्तीमा समान ३ वटा स्वर्ण तथा जुडो र शारीरिक सुगठनमा समान १ स्वर्ण जितेको जिल्ला खेलकुद विकास समिति पाँचथरका अध्यक्ष सन्तोष मोक्तानले जानकारी दिए ।

आइ.टि.एफ तेक्वान्दोमा दर्शन सेलीङ,आलोक राई ४५ केजी समुह र अनिस सेलीङ ६० केजी समुहमा स्वर्ण पदक जितेका हुन् । फुलकन्ट्रयाक कराँतेमा श्रृष्टी आङदेम्बे ४० केजी समुहमा, विना तुम्बपो ५० केजी समुहमा, इक्सा माङलाक ५५ केजीमा स्वर्ण पदक जितेका छन् ।

कुस्तीमा अमिलेख नेम्बाङ ७४ केजी समुहमा,बर्णा लिम्बु चोम्बाङ ५७ केजी समुहमा, प्ररणा लिम्बु ५३ केजी समुहमा स्वर्ण पदक जितेका छन् । जुडोमा उत्तम प्रधानले ७७ केजी समुहमा स्वर्ण पदक जितेका छन् ।

शारीरिक सुगठनमा पवन भट्टराई ७० केजी तौलसमूहमा स्वर्ण पदक जितेका हुन् । जिल्लाकी फुटबल खेलाडी प्रविना कालीकोटे, रग्बी पुरुष टोलीमा बुद्धिराज राई,विनय तुम्बापो,सन्दीप कुमार राई र बुद्धिचालबाट प्रशान्त दाश चेम्जोङ प्रदेश छनोटमा छनोट भएका छन् ।

प्रदेश छनोटमा पाँचथरबाट १७ खेल २ सय ६६ जना खेलाडीले प्रतिस्पर्धा गरेका थिए । नवौं राष्ट्रिय खेलकुद प्रतियोगीता गण्डकी प्रदेशमा असोज २८ गतेदेखि कात्तिक ३ गतेसम्म सञ्चालन हुनेछ ।