काठमाडौं (हाम्रो खेलकुद) – दोलखा चेस होम्सले आठौं तुल्सीलाल स्मृति राष्ट्रिय क्लब टिम चेस च्याम्पियनसिपको उपाधि  जितेको छ।

ललितपुर स्पोर्ट्स क्लबको आयोजनामा ललितपुर क्यास्पियन कलेजमा ५ दिन चलेको ७;चरणको राष्ट्रिय चेस टिम प्रतियोगितामा दोलखाले ६ खेलमा जित र १ मा हार बेहोरेको थियो। दोलखा १२ अंक प्रोग्रेसिभ २० प्वाइन्ट जोडेर च्याम्पियन बनेको हो।

दोलखा जिल्ला संघ ५ जित र २ खेलमा बराबरी नतिजा निकाल्दै १२ अंक १९.५ प्रोग्रेसिभ प्वाइन्टका आधारमा दोस्रो भयो।

ललितपुरको महालक्ष्मी नगरपालिका ४ जित, २ बराबर र १ खेलमा हार ब्यहोर्दै १० अंकका साथ तेस्रो भयो ।
ललितपुर महानगरपालिका ४ जित, १ बराबर र २ हारसहित ९ अंक प्रोग्रेसिभ १७ प्वाइन्टका आधारमा चौथो बन्यो।

गत संस्करणको विजेता थापाथली चेस पार्कले समान जित हात परिणाममा ९ अंक जोडेर १६.५ प्रोग्रेसिभ प्वाइन्टका आधारमा पाँचौं स्थानमा रहे।

बुटवल उपमहानगरपालिका छैटौं र मध्यपुर ठिमी नगर चेस संघ सातौँ भयो। व्यक्तिगत उत्कृष्ट प्रदर्शन गर्नेमा महालक्ष्मी नगरपालिका क्षितिज भण्डारी, सुरोज महर्जन र कमल श्रेष्ठ तथा दोलखा चेस होम्सका पुरुषोत्तम चौलागाईं र मध्यपुर ठिमीका अभिक शाह रहे।

विजेता टोलीले २ लाख, दोस्रोले १ लाख, तेस्रोले ६० हजार र चौथो टोलीले ४० हजार रुपैयाँ प्राप्त गर्यो ।‌
व्यक्तिगततर्फ उत्कृष्ट ५ खेलाडीले जनही नगद १० हजार रुपैयाँ प्राप्त गरे ।

ललितपुर महानगरपालिकाका उपप्रमुख मञ्जली शाक्य बज्राचार्यले विजेता टोलीका खेलाडीलाई पुरस्कृत गरिन् ।