पोखरा (हाम्रो खेलकुद) – त्रिभुवन आर्मी क्बलले नवौं राष्ट्रिय खेलकुदअन्तर्गत एथलेटिक्सको ४ गुणा ४ सय मिटर रिले दौडको महिला र पुरुष दुवै स्पर्धामा स्वर्ण जितेको छ ।

पोखरा रंगशालामा विहीबार महिलातर्फको ४ गुणा ४ सय मिटरमा आर्मीले दोस्रो स्थानमा दौड पूरा गरेपनि एपिएफ डिस्क्वालीफाइ हुँदा स्वर्ण जितेको हो । एपिएफले पहिलो स्थानमा दौड पूरा गरेपनि लेन चेन्ज गर्ने क्रममा गल्ती गरेपछि पदकबाट बन्चित भयो । रिलेमा दोस्रो ल्यापको पहिलो टर्न पूरा नहुँदै एपिएफले लेन चेन्ज गरेपछि निर्णायकले रेस चलिरहँदा अयोग्य भएको बताएका थिए ।

आर्मीको सरस्वती भट्टराई, जयरानी थारु, निर्मला थापा र कलेसी चौधरी सम्मिलित टिमले ४ मिनेट ०२.७८ सेकेन्डमा निर्धारित दूरी पूरा गर्दै स्वर्ण जितेको हो । निशा थारु, सम्झना थारु, अरुणा रिजाल र रामकुमारी थारु आबद्ध लुम्बिनी प्रदेशले ४ मिनेट १४.८० सेकेन्डमा रजत पदक जितेको छ । अन्जु खड्का, राजीना दुलाल, स्वागता खाइजु, सन्तोषी श्रेष्ठ सम्मलित बागमतीले ४ मिनेट २२.७९ सेकेन्डको समय निकाल्दै कास्य जितेको छ ।

पुरुषतर्फ भएको ४ गुणा ४ सय मिटरमा पनि आर्मीले स्वर्ण पदक जितेको छ । सोमबहादुर कुमाल, रामप्रसाद थारु, जीवन चौधरी र प्रकाश दनुवार आबद्ध आर्मी टिमले ३ मिनेट १८.३६ सेकेन्डमा निर्धारित दूरी पूरा गर्दै स्वर्ण पदक जित्न सफल भयो ।

निरप्रताप महतो, आशिष चौधरी, शिवराज पार्की र सन्दीप नेपाली आबद्ध एपीएफले ३ मिनेट २५.८२ सेकेन्डमा पूरा गर्दै रजत पदक जित्न सफल भयो । अमृत बोट, सहन चन्द्र शाह, टेकबहादुर कार्की र अरुण महतो थारु सम्मलित पुलिसले ३ मिनेट २९.३५ सेकेन्डमा निर्धारित दूरी पूरा गर्दै कास्य पदक जितेको छ ।