धनगढी (हाम्रो खेलकुद) – दोलखाका आशिष फुयालले सुदुर पश्चिम बुद्धिचाल संघको आयोजनामा भएको मुख्यमन्त्री कप राष्ट्रिय एमेच्योर बुद्धिचाल प्रतियोगिताको उपाधि जितेका छन् । आशिषले अन्तिम चरणको खेलमा मंगलबार पूर्व नेपाल च्याम्पियन पुरुषोत्तम चौलागाईंसंग बराबरी खेलेका थिए ।

नवौं चरणसम्म भएको खेलमा आषिशले अपराजित रहेर ६ खेलमा जीत निकाले भने ३ खेलमा बराबरी खेल्दै साढे ७ अंक सहित पाँचौ राष्ट्रिय एमेच्योर विजेता भएका हुन् । आशिषले उपाधि सहित ४० हजार रुपैयाँ प्राप्त गरे । त्यसैगरी पछिल्लो भएका प्रतियोगिताहरुमा उत्कृष्ट प्रदर्शन गरिरहेका १४ बर्षिय काठमाडौका पुरुषोत्तम सिलवाल दोस्रा भए ।

७ अंक जोडेका पुरुषोत्तमले समान अंक जोडेका पूर्व नेपाल च्याम्पियन नवीन तन्डुकारलाई ट्राईबेकरमा पछाडि पारेका थिए । पुरुषोत्तमले नवौं चरणको खेलमा ललितपुरका क्याण्डिडेट मास्टर हराउन सफल भए । नवीन तन्डुकार तेस्रा भए । पुरुषोत्तमले २५ हजार र नविनले १५ हजार रुपैयाँ प्राप्त गरे ।

त्यसैगरी काठमाडौका शुसुरत दाहाल चौथो , कैलालीका रोशन थापा पाँचौं, कन्चनपुरका टेकेन्द्र राज पाठक छैटौं, बाँकेका तिर्थ बहादुर बिक सातौं, दोलखाका राजिव कार्की आठौं, काठाडौका पुरुषोत्तम चौलागाईं नवौं र महोत्तरीका लक्ष्मण कुमार सेठ दसौं भए ।

महिलातर्फ कुसुम पाण्डे विजयी भइन् । मोरडकी शान्ति धिमाल दोस्रो र झापाकी पूजा सिंखडा तेस्रो भइन् । कुसुमले २० हजार, शान्तिले १५ हजार र पूजाले १० हजार रुपैयाँ प्राप्त गरिन् । ३५ जिल्लाका ८५ जना खेलाडीको सहभागिता रहेको प्रतियोगिता विजेतालाई सुदूर पश्चिम खेलकुद परिषदका सदस्य सचिव दिपक सिंहले पुरस्कृत गरे ।