काठमाडौं (हाम्रो खेलकुद) – तेक्वान्दोकी पारा ओलम्पियन पलेशा गोवर्धन प्रशिक्षण गर्न र आर्किटेक्चर इन्जिनियर अध्ययनका लागि चीनको शाङघाईस्थित टोङ्जी विश्वविद्यालय कलेज अफ आर्किटेक्चर जाने भएकी छिन् ।

नेपाल तेक्वान्दो संघका अनुसार उनी सोमबार त्यसतर्फ जाने भएकी छिन् । चीनको हान्झाउमा १९ औं एसियाली खेलकुद (असोज ६ देखि २१ गते सम्म) पछि हुने एसियाली पारा खेलकुदमा पलेशाले नेपालको प्रतिनिधित्व गर्नेछिन् ।

पलेशा विश्व वरियतामा सातौं स्थानमा छिन् । टोकियो २०२० पारा ओलम्पिकमा पलेशाले दुई खेल जित्ने क्रममा अमेरिका र सर्वियाकी खेलाडीलाई हराएकी थिइन् । चीनकी खेलाडीसँग पराजित हुँदै पलेशा पदकबाट विमुख भएकी थिइन् । पलेशाले बहराईन युथ एशियाली पारा खेलकुदमा स्वर्ण पदक जितेकी थिइन् ।

पलेशाले चनिमा राम्रो तेक्वान्दो क्लबमा प्रशिक्षणको मौका पाउने सम्भावना रहेकोले एसियाली पारा खेलकुदमा उनीले कडा चुनौती पेश गर्ने अपेक्षा गरिएको छ । तेक्वान्दो संघबाट चीनको तेक्वान्दो संघ संग समन्वय गरेर तेक्वान्दो प्रशिक्षणको व्यवस्थाको मिलाउने प्रयास गरिएको राष्ट्रिय पारा तेक्वान्दोका प्रशिक्षक कविराज नेगी लामाले बताएका छन् ।

पलेशालाई आइतबार तेक्वान्दो संघका अध्यक्ष प्रकाशशम्शेर राणा, उपाध्यक्ष भानबहादुर चन्द, संघका महासचिव दीपराज गुरुङ्ग, केन्द्रिय सदस्य बब्लु शिवाकोटी र प्रशिक्षक लामालगायतले विदाई गरे ।