हाङ्गचौं (हाम्रो खेलकुद)– एसियाली खेलकुद (एसियाड) को महिला भलिबलमा नेपाली राष्ट्रिय टोली पराजित भएको छ । दक्षिण एसियाली प्रतिद्वन्द्वी भारतसँग बुधबार भएको खेल नेपालले ३–१ ले गुमाएको थियो ।

भारतलाई कडा टक्कर दिनाका वावजुद नेपाल जितबाट चुकेको थियो । तेस्रो सेटमा एक समय ६ अंकको अग्रतालाई जोगाउन नसक्दा नेपालले अन्त्यमा त्यो सेट गुमाएको थियो ।

पहिलो सेट २५–२३ ले गुमाएको नेपालले दोस्रो खेल २६–२८ ले आफ्नो पक्षमा पारेको थियो । तेस्रो सेटमा नेपालले पुनः २५–२३ ले गुमाएको थियो । एक समय ६ अंक (१९-१३) को अग्रता लिएको नेपाल अन्तिम समयमा लय गुमाउँदा खेलमा पछि परेको थियो । चौथो सेटमा निकै हावी रहेको भारतले २५-१७ ले सहजै आफ्नो पक्षमा पार्यो ।

एसियाडमा अब नेपालले ११ औं स्थानका लागि प्रतिस्पर्धा गर्नेछ । समूह चरणमा भियतनाम र कोरियासँग पराजित भएको नेपालले नवौं स्थानको खेलमा छनोट हुनका लागि भारतसँग प्रतिस्पर्धा गरेको थियो । अब नेपालले हङकङ, मंगोलिया र अफगानिस्तान सम्मिलित प्लेअफ समूहको विजेतासँग खेल्नेछ ।

चार वर्षअघि स्वदेशमा भएको दक्षिण एसियाली खेलकुद (साग) को फानइनलमा भारतलाई कडा टक्कर दिनका वावजुद नेपाली टोली ३–२ ले पराजित भएको थियो । गत वर्ष काठमाडौंमै भएको काभा महिला च्यालेन्ज कपमा पनि नेपाल भारतसँग पराजित भएको थियो । महिला भलिबलमा नेपालले अहिले सम्म भारतलाई हराउन सकेको छैन ।