काठमाडौं (हाम्रो खेलकुद)– तीव्र प्रतिस्पर्धात्मक र रोमाञ्चक खेलमा चन्द्रागिरी नगरपालिका न्यु डायमण्ड महिला भलिबल टिमले होङवाङ्जी ढोरपाटन महिला भलिबल डबल लिग च्याम्पियनसिपमा जित निकालेको छ ।

न्यु डायमण्ड त्रिभुवन आर्मी क्लबलाई ३-२ ले हराउँदै जितबाट लिगको‌ यात्रा सुरू गरेको हो। पहिलो सेट गुमाएको न्य डायमण्डले १८-२५, २५-२३,२८-२६,१५-१८ र १५-११ ले विजयी भएको थियो। अन्तिम सेटको सुरुवातमा‌ पछि परेर पनि न्यु डायमण्डले‌ खेल उल्टाएको थियो।

पहिलो दिनको‌ खेलमा दुई विभागीय टोली नेपाल पुलिस क्लब र एपिएफ विजयी भएका थिए। साविक विजेता समेत रहेको एपिएफले बागमती प्रदेशलाई ३-० को सोझो सेटमा हराएको थियो। एपिएफ बागमतीलाई २५-४, २५-५ र २५- २ ले सजिलै हराएको थियो।

ढोरपाटन स्पोर्टस क्लबको आयोजनामा गोगंबु बसपार्क नजिक डिभी मार्केटसँगैको कोर्टमा शुक्रबार सुुरु भएको लिगको पहिलो खेलमा पुलिसले जावलाखेल भलिबल ट्रेनिङ क्लबलाई ३-० ले हराएको थियो।

नियमित कप्तान कमला पुन, उषा भण्डारी र कामना विष्ट विना उत्रेको पुलिसले २५-१०,२५-१२ र २५-४ ले सहजै खेल जितेको थियो। पुलिसकी‌ कोपिला राना प्लेयर अफ दि म्याच घोषित भएकी थिइन् ।

ढोरपाटन क्लबले आयोजना गरेको लिगमा एपिएफ, बागमती, पुलिस , जावलाखेल, आर्मी क्लब, न्यु डायमण्ड , धादिङ स्पोर्टस क्लब र एन्जल्स हार्ट गरि ८ टोलीको सहभागिता रहेकाे छ ।

पहिलो लिगको शीर्ष ६ स्थानमा रहने टोलीले दोस्रो लिगमा पुनः प्रतिस्पर्धा गर्ने ढोरपाटनले जनाएको छ ।ढोरपाटनको १६ औं संस्करणको उत्कृष्ट खेलाडी र वर्षको उत्कृष्ट खेलाडीले एम्पियरको स्कुटर प्राप्त गर्नेछन् ।

प्रतियोगिताको विजेता टोलीले ५ लाख १ हजार, दोस्रो टोलीले २ लाख ५० हजार, तेस्रो टोलीले १ लाख २५ हजार, चौथो टोलीले ७५ हजार, पाँचौं टोलीले ५० हजार र छैटौं टोलीले २५ हजार रुपैयाँ प्राप्त गर्नेछ।