काठमाडौं (हाम्रो खेलकुद)– त्रिभुवन आर्मी क्लबले होङवाङ्जी ढोरपाटन महिला भलिबल डबल लिग च्याम्पियनसिपमा पहिलो जित निकालेको छ ।

विभागीय डर्बीमा आर्मीले आइतबार नेपाल पुलिस क्लबलाई ३-१ ले हराउँदै तेस्रो खेलमा पहिलो जित हासिल गरेको हो ।

प्रतिस्पर्धात्मक तेस्रो र चौथो सेटमा उच्च प्रर्दशनका साथ आर्मीले पुलिसलाई २५-१९, १२-२५,२५-२३,३०-२८ ले हराएको हो । आर्मीकी‌ आरती सुवेदीको प्रदर्शन प्रभावशाली रह्यो र उनै खेलको प्लेयर अफ दि म्याच बनिन् ।

अघिल्ला दुई खेलमा आर्मी चन्द्रागिरी नगरपालिका न्यु डायमण्ड महिला भलिबल टिमसँग ३-२ र एपिएफसँग ३-१ ले पराजित भएको थियो। पुलिसले पहिलो खेलमा जावलाखेल भलिबल ट्रेनिङ क्लब र अर्कोमा एन्जल्स हार्ट कलेजलाई हराएको थियो।

यसअघि आज साविक विजेता एपिएफ र न्यु डायमण्डले च्याम्पियनसिपमा लगातार तेस्रो तथा धादिङ स्पोर्टस क्लबके दोस्रो जितेको छ। सबै ३ खेल जित्नेमा एपिएफ र न्यु डायमण्ड मात्र छन्।

ढोरपाटन स्पोर्टस क्लबको आयोजनामा गोगंबु बसपार्क नजिक डिभी मार्केटसँगैको कोर्टमा जारी प्रतियोगिता एपिएफले जावलाखेललाई ३-० ले हराएको थियो । एपिएफले २५-१, २५-३,२५- ले सहजै जितेको थियो। पहिलो सेटमा एपिएफले १७ अंक जोडेपछि जावलाखेलले पहिलो अंक बटुलेको थियो। त्यो पनि एपिएफको गल्तिमा जावलाखेले अंक जोडेको हो । जावलाखेलको त्यो तेस्रो हार हो ।

९ अंकसहित एपिएफ शीर्षस्थानमा उक्लेको‌ छ। चन्द्रागिरी नगरपालिका महिला भलिबल टिमको  न्यु डायमण्न्डको  ८ अंक  छ । धादिङ स्पोर्टस क्लब, साविक , नेपाल पुलिस क्लबको समान ६  तथा त्रिभुवन आर्मी क्लबको ४ अंक छ ।

त्यसअघि न्यु डायमण्डले एन्जल्स हार्ट कलेजलाई २५–१३,२५–८, २५–९ को सोझो सेटले हराएको थियो ।
न्यु डायमन्डले यसअघि पहिलो खेलमा आर्मी र अर्को खेलमा बागमती प्रदेशलाई हराएको थियो । आइतबारको पहिलो खेलमा धादिङले बागमतीलाई २५–८, २५–१३,२५–१२ ले हराएको थियो। बागमतीले लगातार तेस्रो खेल गुमाएको छ ।

आज अन्तिम खेल धादिङ र एन्जल्स हार्टबीच हुनेछ ।ढोरपाटन स्पोर्टस क्लबले आयोजना गरेको लिगमा एपिएफ, बागमती, पुलिस , जावलाखेल, आर्मी , न्यु डायमण्ड , धादिङ र एन्जल्स हार्ट गरि ८ टोलीको सहभागिता रहेको छ ।

पहिलो चरणमा शीर्ष ६ स्थानमा रहने टोलीले दोस्रो लिगमा पुनः प्रतिस्पर्धा गर्ने ढोरपाटनले जनाएको छ । ढोरपाटनको १६ औं संस्करणको उत्कृष्ट खेलाडी र वर्षको उत्कृष्ट खेलाडीले एम्पियरको स्कुटर प्राप्त गर्नेछन् ।

प्रतियोगिताको विजेता टोलीले ५ लाख १ हजार, दोस्रो टोलीले २ लाख ५० हजार, तेस्रो टोलीले १ लाख २५ हजार, चौथो टोलीले ७५ हजार, पाँचौं टोलीले ५० हजार र छैटौं टोलीले २५ हजार रुपैयाँ प्राप्त गर्नेछ ।