काठमाडौं (हाम्रो खेलकुद) – जावलाखेल भलिबल ट्रेनिङ क्लबले होङवाङ्जी  ढोरपाटन महिला भलिबल डबल लिग च्याम्पियनसिपमा पहिलो जित निकालेको छ ।

गोगंबु बसपार्क नजिक डिभी मार्केटसँगैको कोर्टमा जारी प्रतियोगिताको चौथो दिन सोमबारको‌ पहिलो खेलमा जावलाखेलले बागमती प्रदेशलाई ३-० को सोझो सेटमा हराएको हो । जावलाखेलले बागमतीलाई २५-२०, २५-२२, २५- १०ले हराएको‌ छ।

जावलाखेलको चौथो खेलमा‌ यो‌ पहिलो जित हो । यसअघि नेपाल पुलिस क्लब, एपिएफ र धादिङ स्पोर्टस क्लबसँगको‌ खेल जावलाखेलले गुमाएको थियो। बागमतीले अहिलेसम्म जितको‌ खाता खोल्न सकेको छैन ।

आज अरु ३ खेल हुनेछ । त्रिभुवन आर्मी क्लब र एन्जल्स हार्ट कलेजबबीच, साविक विजेता एपिएफ र पुलिस बीच तथा अन्तिम खेल चन्द्रागिरी नगरपालिका महिला भलिबल टिम र धादिङबीच हुनेछ।

९ अंकसहित एपिएफ शीर्षस्थान, दोस्रो स्थानको न्यु डायमण्न्डको  ८ अंक  छ । धादिङ स्पोर्टस क्लब , पुलिसको समान ६ , आर्मीको ४ र एन्जल्स हार्ट र जावलाखेलको समान ३ अंक छ ।

ढोरपाटन स्पोर्टस क्लबले आयोजना गरेको लिगमा एपिएफ, बागमती, पुलिस , जावलाखेल,  आर्मी , न्यु डायमण्ड , धादिङ  र एन्जल्स हार्ट गरि ८ टोलीको सहभागिता रहेको छ ।

पहिलो चरणमा शीर्ष ६ स्थानमा रहने टोलीले दोस्रो लिगमा पुनः प्रतिस्पर्धा गर्ने ढोरपाटनले जनाएको छ । ढोरपाटनको १६ औं संस्करणको उत्कृष्ट खेलाडी र वर्षको उत्कृष्ट खेलाडीले एम्पियरको स्कुटर प्राप्त गर्नेछन् ।

प्रतियोगिताको विजेता टोलीले ५ लाख १ हजार, दोस्रो टोलीले २ लाख ५० हजार, तेस्रो टोलीले १ लाख २५ हजार, चौथो टोलीले ७५ हजार, पाँचौं टोलीले ५० हजार र छैटौं टोलीले २५ हजार रुपैयाँ प्राप्त गर्नेछ ।