काठमाडौं (हाम्रो खेलकुद )- एपिएफले होङवाङ्जी  ढोरपाटन महिला भलिबल डबल लिग च्याम्पियनसिपमा अपराजित यात्रालाई‌ कायम राखेको छ ।

ढोरपाटन स्पोर्टस क्लबको आयोजनामा गोगंबु बसपार्क नजिक डिभी मार्केटसँगैको कोर्टमा जारी प्रतियोगिताको पाँचौं दिन मंगलबारको‌ पहिलो खेलमा एपिएफले एन्जल्स हार्ट कलेजलाई ३-० ले हराउँदै लगातार पाँचौं खेल जितेको हो ।

तेस्रो सेटमा कडा चुनौतीको सामना गरेको साविक विजेता समेत रहेको एपिएफले एन्जल्स हार्टलाई २५-१६,२५-१४ र २५-२३ को सोझो सेटमा पराजित गरेको हो । एन्जल हार्टले भने अहिलेसम्म १ खेल‌ जितेको छ।

आज थप ३ खेल हुनेछन्। दोस्रो खेल चन्द्रागिरी नगरपालिका महिला भलिबल टिम र जावलाखेल भलिबल ट्रेनिङ क्लब, तेस्रो खेल त्रिभुवन आर्मी क्लब र धादिङ स्पोर्टस क्लब तथा अन्तिम खेल नेपाल पुलिस क्लब र बागमती प्रदेशबीच हुनेछ।

एपिएफ १५ अंकसहित शीर्षस्थानमा छ भने दोस्रो स्थानको न्यु डायमण्न्डको  ११ अंक  छ । आर्मीको‌ ७, धादिङ स्पोर्टस क्लब र पुलिसको समान ६ तथा एन्जल्स हार्ट र जावलाखेलको समान ३ अंक छ ।

ढोरपाटन स्पोर्टस क्लबले आयोजना गरेको लिगमा एपिएफ, बागमती, पुलिस , जावलाखेल,  आर्मी , न्यु डायमण्ड , धादिङ  र एन्जल्स हार्ट गरि ८ टोलीको सहभागिता रहेको छ ।

पहिलो चरणमा शीर्ष ६ स्थानमा रहने टोलीले दोस्रो लिगमा पुनः प्रतिस्पर्धा गर्ने ढोरपाटनले जनाएको छ । ढोरपाटनको १६ औं संस्करणको उत्कृष्ट खेलाडी र वर्षको उत्कृष्ट खेलाडीले एम्पियरको स्कुटर प्राप्त गर्नेछन् ।

प्रतियोगिताको विजेता टोलीले ५ लाख १ हजार, दोस्रो टोलीले २ लाख ५० हजार, तेस्रो टोलीले १ लाख २५ हजार, चौथो टोलीले ७५ हजार, पाँचौं टोलीले ५० हजार र छैटौं टोलीले २५ हजार रुपैयाँ प्राप्त गर्नेछ ।