काठमाडौं (हाम्रो खेलकुद)- आरभ सम्राट हाडा र स्वस्तिका विष्टले ११ औं संस्करणको सिटिजन्स बैंक टेनिस प्रतियोगिताको उपाधि जितेका छन् ।

पुरुष सिंग्लसतर्फ आज भएको फाइनलमा निशान श्रेष्ठलाई ६–३ र ६–२ को सोझो सेटमा पराजित गरे। आरभको समग्रमा यो तेश्रो सिनियर सिंगल्स उपाधि हो ।

यसअघि उनले गणेशमान सिंह टेनिस र माछापुच्छ्रे टेनिसको उपाधि जितेका थिए । निहालजंगबहादुर थापा र राजवीर प्रधान तेश्रो भए ।

महिलातर्फ नवौं र दसौं संस्करणकी उपाधि विजेता अभिलाषा विष्टलाई माथ दिंदै स्वस्तिकाले करियरको पहिलो सिंग्ल्स उपाधि जितिन्।

लगातार तेस्रो पटक उपाधि जित्दै ह्याट्रिक गर्न दाउमा रहेकी अभिलाषाको प्रदर्शन फितलो रहयो। स्वस्तिकाले उनलाई ६–१ र ६–३ को सोझो सेटमा पराजित गरिन्।

४ वर्षे टेनिस करियरमा स्वस्तिकाको यो नै पहिलो सिनियर सिंगल्स उपाधि हो । आइशा डोल्कर गुरुङ र जेनी खड्काले तेश्रो स्थान प्राप्त गरे।

पुरुष र महिला दुवैमा पहिलो, दोस्रो र तेस्रो हुने खेलाडीले क्रमशः ५० हजार, २५ हजार र १०/१० हजार रुपैयाँ प्राप्त गरे।

वैशाख १४ गतेदेखि सुरु भएको प्रतियोगितामा १ सय ६३ खेलाडी सहभागिता रहेको थियो । सबै स्पर्धामा गरि कुल पुरस्कार ५ लाख ८२ हजार ५ सय रुपैयाँ रहेको थियो ।