धनगढी (हाम्रो खेलकुद)– ओलम्पियन तेक्वान्दोका दीपक विष्ट गृह नगर धनगढीमा सम्मानति भएका छन् । धनगढीमा जारी नेपाल आइस सुदूरपश्चिम खप्तड गोल्ड कप फुटबल प्रतियोगिताको पहिलो सेमिफाइतलका दौरान शनिबार विष्ट सम्मानित भएका हुन् ।

खप्तड गोल्ड कपको आयोजक सुदूरपश्चिम ११ का अध्यक्ष सुरेश हमाल, उपाध्यक्ष गजेन्द्र शाही, सचिव योगेन्द्र चन्द, अखिल नेपाल फुटबल संघ (एन्फा)का गणेश चन्द, कैलाली जिल्ला खेलकुद विकास दीपक सिंहलगायतले सम्मान गरेका दिए । गोल्ड कप आयोजनामा समेत सहयोगी भूमिका निर्वाह गरेका दीपकलाई ८ किलोको माला र सम्मान पत्रले सम्मान गरिएको थियो ।

सम्मानपछि बोल्दै दीपकले आफु सुदूरपश्चिमको खेलकुद विकासका लागि लागि पर्ने वचन दिए । ‘सुदूरपश्चिम खेलाडी उत्पादका लागि उर्वर भूमि हो,’ धनगढी चटकपुरका स्थायी बासिन्दा समेत रहेका उनले भने, ‘तर, खेलकुद विकासका लागि भौतिक पूर्वाधार निर्माण हुन उत्तिकै जरुरी छ । धनगढी रंगशालालाई अन्तर्राष्ट्रिय स्तरको बनाउन र अन्य खेलकुदका पूर्वाधार निर्माणका लागि म आफ्नो ठाँउबाट पहल गर्नेछु ।’

२०५१ मा धनगढीबाट खेल जीवनको सुरुआत गरेका दीपक देशका लागि दक्षिण एसियाली खेलकुद (साग) मा लगातार ४ वटा स्वर्ण पदक जित्ने एक्लो नेपाली खेलाडी हुन् । उनले नेपालमा सन् १९९९ मा आयोजना भएको आठौं देखि ११ औं सागसम्म स्वर्ण पदक जितेका थिए । त्यस्तै उनले २००२ बुसान र २००६ दोहा एसियाली खेलकुदमा कास्य पदक जितेका थिए । छनोट चरण पार गरेर २००८ को बेजिङ ओलम्पिक खेलेका दीपक अहिले नेपाल तेक्वान्दो संघका सचिव र प्रशिक्षक पनि हुन् ।

आजको खेल जित्दै त्रिभुवन आर्मी क्लब खप्तड गोल्ड कपको फाइनलमा पुगेको छ । लक्ष्मी हुन्डाई मनाङ मस्र्याङ्दी क्लबलाई ३–१ ले हराउँदै आर्मी उपाधि नजिक पुगेको हो । आयोजक सुदूरपश्चिम ११ र नेपाल एपिएफ मध्ये एकसँग आर्मीले फाइनल खेल्नेछ । आर्मीले यो वर्ष ३ वटा नकआउट उपाधि जितिसकेको छ । खप्तड विजेताले उपाधिसहित ११ लाख ११ हजार १ सय ११ र दोस्रो हुने टोलीले ५ लाख ५५ हजार ५ सय ५५ रुपैयाँ प्राप्त गर्नेछ ।