दिपक न्यौपाने
बुटवल –पाल्पा जिल्लाको तालतुङमा २४ बर्ष अगाडि जन्मिएका विकास खड्काले ६ कक्षासम्म पढ्दा सपना बुनेका थिए – लाहुरे बन्ने । जब उनी स्कुले जीवनको दौरानमा राजधानी छिरे उनले लाहुरे बन्ने सपना छाडे, उनी खेलतर्फ लोभिए । काठमाडौंको केएमसीमा पढेका विकास १३ बर्ष देखि लन टेनिसमा आफुलाई जमाउने कोशिसमा छन् ।
त्यसो त उनी लन टेनिसका राष्ट्रिय खेलाडी तथा नेपालका कान्छा प्रशिक्षक बनिसकेका छन् । पाल्पाको उकालो ओरालो गर्दै हुर्केका विकासले काठमाडौंमा सुमन सोमाइसँग भेटे त्यसपछि उनी टेनिसतर्फ मोडिए । पहिला कराते खेल्ने विकास साथीभाईको संगतले टेनिसमा लागिरहे । त्रिभुवन आर्मी क्लबबाट टेनिस खेल्दै आएका विकास लन टेनिस सघं रुपन्देही र बुटवल लन टेनिस क्लबमा आबद्ध छन् । उनी न्यू होराइजनका विधार्थीलाई पनि प्रशिक्षण दिइरहेका छन् ।
प्रशिक्षकका रुपमा परिचय बनाउँदै गएका विकासले राजधानी हुँदा श्यामकृष्ण जिसीको प्रशिक्षणमा आफुलाई निखार्ने काम गरे । जागिरसँगै खेललाई पनि अघि बढाए हाम्रो खेलकुद डटकमलाइ उनले भने, अनुशासन र मेहेनत गर्दै जाँदा यहाँसम्मको यात्रा तय गर्न सफल भएको छु । तर पनि गर्न बाँकी धेरै छ । लिटल एन्जल्समा जुनियर टेनिसको फाइनलमा पुगेपछि उनमा टेनिसको लत जस्तै बस्यो । उनी यहि खेलमा स्थापित हुनेमा उनी जुटे ।
‘पाचौं र छैटौंमा मध्यमान्चलबाट तेस्रो तथा सातौं राष्ट्रिय खेलकुदमा स्वर्ण पदक जितेको थिए,’ विकासले थपे, ‘त्यसपछि पनि निरन्तर खेलमा रहे । अहिले सम्म पछाडि फर्कनु परेको छैन ।’ भारत,थाइल्यान्ड र बँगलादेश पुगेर खेलेको अनुभव बटुलिसकेका उनी थाइल्यान्डमा भएको कोचिङमा कोर्समा उत्कृष्ट बनेका थिए ।
नेपाल सेनामा रहेका दाई दिपेन्द्र खड्काको आफ्नो खेल जीवनमा निकै ठूलो साथ रहेको विकास सुनाउँछन् । बुटवल आएपछि गोपाल ज्ञवाली,अर्जुन गुरुङ,अशोक गुरुङ लगायत धेरैको सहयोग पनि टेनिसमै भविष्य देखेका उनले विदेश जाने योजनामा पनि थाती राखेका थिए ।
बुटवल लन टेनिसको कोर्टमा २० जना बालबालिकालाई प्रशिक्षण दिइरहेका विकास विभिन्न उमेर समूहका खेलाडीलाई पनि टेनिसको ज्ञान सिकाउने गर्छन् । ‘केहि वर्षमा बुटवलबाट पनि टेनिसका स्तरीय खेलाडी तयार हुनेछन्,’ उनले थपे, ‘तर त्यसका लागि अभिभावकले पनि खेलकुदको महत्व दिएर छोराछोरीका लागि खेल्ने अवसर जुटाइदिनु पर्दछ ।’
