काठमाडौं (हाम्रो खेलकुद) – विश्व खेलकुद पत्रकार दिवस विभिन्न कार्यक्रम गर्दै मनाइने चलन नेपालमा पनि केहि वर्षयता देखि परम्पराका रुपमा स्थापित भइसकेको छ । नेपाल खेलकुद पत्रकार मञ्चले हरेक वर्ष जस्तो विश्व खेलकुद पत्रकार दिवस (जुलाई २) लाई मनाउँदै आएको छ । यसपटक भने औपचारिक कुनै कार्यक्रम नगरेको मञ्चले मञ्चको त्रिपुरेश्वस्थित कार्यालयमा सदस्यबीच अनौपचारिक अन्र्तक्रिया आयोजना गरेको थियो ।

मञ्चका अध्यक्ष महेश आचार्यले मञ्चका सदस्यहरुका लागि खेल पत्रकारितालाई अझै शसक्त बनाउँदै अघि बढाउन पूर्नताजकी तालिमको आवश्यकता रहेको बताए । उनले भने, हामीले केहि समय अघि देखि नै तालिम आयोजनाको प्रयास गरिरहेका छौं । विभिन्न कारणले सम्भव भइरहेको छैन । तर पनि हामी त्यसतर्फ प्रयासरत छौं ।’

फोटो पत्रकार (पिजे) क्लबका अध्यक्ष विकास कार्कीले खेलकुद पत्रकारले मात्र नभई सबै पत्रकारले अहिलेको समयको माग अनुसार आफ्नोलाई अपडेट गर्न आवश्यक रहेको औल्याए । पत्रकारितामा नयाँ प्रविधिको प्रयोगलाई कसरी अघि बढाउन सकिन्छ भन्नेमा मञ्चले पहल गर्नुे अध्यक्ष कार्कीको सुझाव थियो ।

कान्तिपुरका खेलकुद व्यूरो प्रमुख हिमेश बज्राचार्यले समय समयमा पुराना र नयाँ पुस्ताका खेल पत्रकारबीच अन्तरक्रिया गर्न सके त्यसले खेलकुद पत्रकारिता अझै प्रभावकारी हुन सक्ने बताए । मञ्चका सदस्य एवंम् खेलपाटीका सम्पादक हिमबिक्रम केसीले खेलकुदमा थ्रपै विषय उठान गर्न बाँकी रहेको र त्यसका लागि पुराना पत्रकारले नयाँ पुस्तका पत्रकारलाई हौसाउनुपर्नेमा जोड दिए ।

मञ्चका सदस्य सुजन श्रेष्ठले खेलकुद पत्रकारका पुराना र नयाँ पुस्तामा अन्र्तक्रियासँगै मञ्चले पुस्तकालयलाई पनि व्यवस्थित रुपमा सञ्चालन गर्न सके पत्रकारहरुले अझै आफ्नो काममा सुधार गर्न सक्ने बताए ।

यसैबीच, नेपालगन्जमा पनि स्थानिय निकायका जनप्रतिनिधि, खेलकुदर्मी, स्थानिय सम्पादक र खेलपत्रकारको सहभागितामा खेलकुद पत्रकारिता र खेलकुदका बारेमा चर्चा गर्दै मनाइयो । खेलपत्रकार टीएस ठकुरीको संयोजनमा न्युरोड स्थित युथ सेन्टरमा चियापानका साथ खेलकुद सम्बन्धि चिन्तन गरी दिवस मनाइएको हो ।

दिवस मनाउने जमघटमा नेपालगन्ज उपमहानगरपालिका उपमेयर उमा थापाले समग्र नेपालगन्जको खेलकुद विकासमा उपमहानगरपालिका गम्भीरतापूर्वक लागिरहेको बताइन् । आफु खेलकुद र खेलपत्रकारिता पृष्ठभुमिबाट आएको हुँदा यी दुवै विधाको विकासमा सहकार्य गर्न सदैव तत्पर रहेकोमा उपमेयर थापाले जोड दिइन् । ‘मैले खेलकुद र खेलपत्रकारिताको महत्त्व राम्रोसँग बुझेकी छु,’  उपमेयर मगरले भनिन्, ‘योजनासहित आउनुस, सँगसँगै काम गरौं ।’ उनी राजधानी बाहिरबाट खेलपत्रकारिता गर्ने पहिलो महिला पत्रकार हुन् ।

राष्ट्रिय खेलकुद परिषदका सदस्य विनोद मैनालीले खेल पत्रकारिता विना खेलकुद अघि बढ्न नसक्ने धारणा राखे । नेपालगन्जको खेपत्रकारिताको विकासमा सहयोग गर्न आफु जहिल्यै तयार रहेको उनले बताए । मध्य पश्चिमाञ्चल क्षेत्रिय खेलकुद विकास समितिका अध्यक्ष भिम ओलीले स्थानीय सञ्चारमाध्यमले खेलकुद प्रवद्र्धनमा कुनै कसर बाँकी नराखेको बताए ।

‘स्थानीय पत्रपत्रिका र रेडियोले हाम्रा अभियानलाई भरपुर कभरेज गरेका छन् ,’ अध्यक्ष ओलीले भने, ‘राष्ट्रिय पत्रिकामा पनि कभरेज बढाउन आवश्यक छ ।’  यसै बर्ष मंसिरमा तय गरिएको आठौं राष्ट्रिय खेलकुद सफल पार्न सबै नागरिक तयार रहेको अग्रज साहित्यकार सनत रेग्मीको भनाइ रह्यो । पत्रकार पुर्णलाल चुके, झलक गैरे, दामोदर भण्डारी, शंकर खनाल, कमल डांगी तथा साहित्यकार ऋचा लुइँटेल र मिना ढकालले खेलकुद र खेलपत्रकारिता बारे बोलेका थिए ।