काठमाडौं – नेपाल खेलकुद पत्रकार मञ्चका निर्वतमान अध्यक्ष निरञ्जन राजवंशी अन्तर्राष्ट्रिय खेलकुद पत्रकार संघ (एआइपिएस) एसियाको कोषाध्यक्षमा निर्वारोध निर्वाचित भएका छन् ।
बहराइनमा शुक्रबार भएको निर्वाचनबाट राजवंशी कोषाध्यक्षसहित सबै पदाधिकारी निर्वारोध चुनिएका बहराइनबाट मञ्चका अध्यक्ष अजय फुयालले जानकारी दिएका छन् ।
सदस्यमा भने निर्वाचन भएको थियो । राजवंशी यसअघि सदस्य थिए । मञ्चको तीन कार्याकाल अध्यक्ष रहेका राजवंशी बिबिसी नेपाली सेवामा आबद्ध छन् ।
उनी झन्डै दुई दशक देखि खेलकुद पत्रकारितामा संलग्न छन् । राजवंशीसँगै एआइपिएस एसियाको कंग्रेसमा मञ्चकातर्फबाट अध्यक्ष फुयाल र सदस्य निरञ्जन अधिकारीले पनि भाग लिएका थिए । एआइपिएस एसियामा नेपालसहित ३३ राष्ट्र सदस्य छन् ।
