काठमाडौं (हाम्रो खेलकुद)–क्यामेलिया उच्च माध्यमिक विद्यालय कुलेश्वरले भारतको राजस्थानमा भएको आइमास वल्ड कुमुते च्याम्पियनसिपमा स्वर्णपदक जित्न सफल आफ्ना दुई विद्यार्थी खेलाडीलाई बिहीबार नगदसहित सम्मानित गरेको छ ।
विद्यालयले बिहीबार राजधानीमा पत्रकार सम्मेलनको आयोजना गर्दै स्वर्णधारी आयुसा तामाङ र आर्यन रन्जितलाई जनही १० हजार रुपैयाँसहित ताम्रपत्रले सम्मानित गरेको हो । विद्यार्थीलाई राष्ट्रिय खेलकुद परिषद (राखेप) का सदस्यसचिव केशवकुमार विष्ट र विद्यालयका प्रिन्सिपल रुद्र अधिकारीले सम्मानित गरेका हुन् ।
आयुसाले १६ देखि १७ वर्षमुनिको उमेर समूहमा स्वर्ण तथा आर्यनले ८ देखि ९ वर्षको उमेर समूहमा स्वर्ण हात पारेका थिए । आर्यनले यसअघि सन् २०१८ सेप्टेम्वरमा सिंगापुरमा २७ राष्ट्रका खेलाडीको सहभागिता रहेका च्याम्पियनसिपमा भाग लिएका थिए । जसमा कुल ८ सय ९० खेलाडीले प्रतिस्पर्धा गरेका थिए ।
च्याम्पियनसिपमा नेपाल १० स्वर्ण र दुई कास्यसहित टिम च्याम्पियन बन्न सफल हुदा भारत दोस्रो र कुवे टिम तेस्रो हुन सफल भएको थियो । नेपालबाट २१ खेलाडीले प्रतियोगितामा सहभागिता जनाएका थिए ।
