काठमाडौं (हाम्रो खेलकुद) – नेपालगन्ज म्याराथनको यो पाँचौं संस्करण मंसिरको ७ गते आयोजना हुने भएको छ । ‘शान्ति सदभाव र एकता, राष्ट्र निर्माणमा हाम्रो प्रतिवद्धता’ मुल नाराका साथ आायोजना हुने नेपालगन्ज म्याराथनमा २०१९ को तयारी तिब्र पारिएको आयोजक क्रियटिभ ह्याण्ड्सले जनाएको छ ।

दश बर्षे सशस्त्र द्धन्द्धको औपचारिक अन्त्य भइ बृहत शान्ति सम्झौता भएको दिन ०६३ मंसिर ५ गतेको स्मरणमा नेपालगन्ज म्याराथन आयोजना थालिएको हो । सरोकारवालासँगको परामर्शपछि हरेक मंसिर पहिलो हप्ताको शनिबार नेपालगन्ज म्याराथन आयोजना गर्ने निष्कर्षमा पुगेको आयोजकले जनाएको छ ।

ट्राफिक व्यवस्था मिलाउन सहज हुने भएकाले शनिबार रोजिएको बताइएको छ । त्यसकारण यो वर्ष मंसिर ७ गते नेपालगन्ज म्याराथनको पाँचौं संस्करण हुने बताइएको छ । आयोजक क्रियटिभ ह्याण्ड्सले नेपालगन्ज म्याराथनको पाँचौं संस्करणमा पुरस्कार राशीमा बृद्धि गरेको छ । पुरस्कार राशी भने चाँडै सार्वजनिक गरिने आइतबार जारी विज्ञप्तीमा उल्लेख छ ।

पुरुष खुल्लातर्फ म्याराथन, महिलाको हाफ म्याराथन, ५ किलोमिटर महिला तथा पुरुषको स्कुल स्तरीय तथा खुल्ला दौड समावेश गरिएको छ । त्यसैगरी ८ देखि १२ बर्ष उमेरसमुहको पनि दौड राखिएको छ भने शारीरिक रुपले अशक्तहरुको लागि पनि दौड स्पर्धा समेटिएको छ । यस बर्षदेखि ३ किलोमिटरको कर्पोरेट रन पनि समावेश गरिने विज्ञप्तीमा उल्लेख छ । जसमा जनप्रतिनिधि, चिकित्सक, इन्जिनियर, प्राध्यापक, वकिल, शिक्षक, पत्रकार तथा बिभिन्न पेशा र व्यवसायीहरुले सहभागिता जनाउनेछन् ।

खुल्ला म्याराथनतर्फ शीर्ष आठ जना तथा हाफ म्याराथनमा शीर्ष ६ जनालाई नगद तथा आकर्षक उपहारबाट पुरस्कृत गरिने तथा अन्य सबै विधामा नगद पुरस्कार दिइनेछ बताइएको छ । कर्पोरेट रनका विजेतालाई सरप्राइज पुरस्कार प्रदान गरिनेछ । नेपालगन्ज उपमहानगरपालिका नजिक बीपी चोकदेखि सुरु भइ कोहलपुर चौराहदेखि उत्तरतर्फ पुगी सोही रुट हुँदै पुनः बीपी चोकमा पुरा हुने म्याराथनमा राष्ट्रियस्तरका धावकहरु सहभागि हुनेछन् ।

त्यस्तै, जुम्ला, कालिकोट लगायतका कर्णालीका जिल्लाहरु र प्रदेश ५, ६ र ७ का खेलाडीहरुले भाग लिदै आएका छन् । नेपालगन्ज म्याराथनको पहिलो संस्करणमा नेपाली सेनाका होमलाल श्रेष्ठ, दोस्रोमा सेनाकै कृष्ण बस्नेत, तेस्रोमा जुम्लाका दुर्ग बुढा र चौथो संस्करणमा नेपाल पुलिस क्लबका भुमिराज राईले जितेका थिए । नेपालगन्ज र कोहलपुरलाई भावनात्मक रुपमा अझै जोड्नका लागि पनि यो म्याराथन महत्वपूर्ण हुने विश्वास आयोजकले लिएको छ ।

महिला हाफ म्याराथनमा नेपालकी नम्बर एक धाविका कान्छीमाया कोजु दुई संस्करणमा विजेता भइसकेकी छिन् । यसपटक सबै विधामा नगद पुरस्कार बृद्धि गरिने बताइएको छ । नेपालगन्ज म्याराथनलाई बर्षेनी स्तरीय बनाउदै राष्ट्रियस्तरको भव्य प्रतियोगिताका रुपमा स्थापित गर्ने आयोजक टिमको परिकल्पना रहेको आयोजक क्रियटिभ ह्याण्डस्का अध्यक्ष टीएस ठकुरीले बताए ।