काठमाडौं (हाम्रो खेलकुद)– नेपाल बक्सिङका पूर्व पदाधिकारीको पहलमा बक्सिङ खेलाडी अक्षय कोष स्थापना हुने भएको छ । संघका पूर्व पदाधिकारीले नेपाल राष्ट्रिय तथा अन्तर्राष्ट्रिय खेलाडी संघ (एनएनआइपिए) का युके च्याप्टरका अध्यक्ष एवंम पूर्व बक्सर सिद्धार्थ विक्रम क्षेत्रीको सम्मानमा सोमबार आयोजित कार्यक्रममा संघका पूर्व महासचिव दीपक गुरुङले बक्सिङ खेलाडीका लागि अक्षय कोष स्थापना गर्ने घोषणा गरे ।

सम्मान कार्यक्रममा दायाँबाट क्रमश – नेपाल बक्सिङका संघका पूर्व अध्यक्ष राजीव श्रेष्ठ, पूर्व बक्सर सिद्धार्थ विक्रम क्षेत्री र संघका पूर्व महासचिव दीपक गुरुङ ।

गुरुङले कोषमा १ लाख रुपैयाँ दिने घोषणा गरे । संघका पूर्व अध्यक्ष राजीव श्रेष्ठ र सोमबार सम्मानित भएका पूर्व बक्सर क्षेत्रीले समान १ लाख रुपैयाँ अक्षय कोषमा दिने घोषणा गरे । त्यस्तै ब्याडमिन्टनका अन्तर्राष्ट्रिय अम्पायर एवंम् काठमाडौं जिल्ला ब्याडमिन्टन संघका अध्यक्ष दीपक थापाले १० हजार रुपैयाँ सहयोगको घोषणा गरे ।

गुरुङले खेलाडीहरुलाई साह्रो गाह्रो पर्दा अक्षय कोषको रकमको ब्याजबाट सहयोग गर्ने योजना रहेको सुनाए । पूर्व अध्यक्ष श्रेष्ठ अक्षय कोषमा १ करोड रुपैयाँ पुर्याउने लक्ष्य रहेको सुनाए । १३ वर्षदेखि बेलायतमा रहेर पनि नेपाली खेलाडीहरुलाई अप्ठेरो पर्दा सहयोग गर्ने पुण्य कामको नेतृत्व गर्दै आएका क्षेत्रीलाई उनले पुर्याएको योगदानको कदर गर्दै संघका पूर्व पदाधिकारीले सम्मान गरेका हुन् ।

बक्सिङ परिवारका नाममा आयोजित सम्मान कार्यक्रम बक्सिङ संघका पूर्व अध्यक्ष राजीव श्रेष्ठ र पूर्व महासचिव दीपक गुरुङको पहलमा सम्मान गरिएको थियो । उनीहरुले क्षेत्रीलाई दोसल्ला र बुद्धको प्रतिमाका उपहार दिदै सम्मान गरेका हुन् ।

क्षेत्रीको पहलमा केहि दिनअघि नेपालका लागि अन्तर्राष्ट्रिय प्रतियोगितामा पहिलो गोल गरेका वाइबी घलेलाई २ लाख रुपैयाँ सहयोग गरिएको थियो । अखिल नेपाल फुटबल संघ (एन्फा) का पूर्व केन्द्रिय सदस्य समेत रहेका घले ११ वर्षदेखि पक्षघातबाट पीडित छन् ।