दिपक बोहोरा, पाँचथर

खेलकुदका लागि पूर्व त्यसमा पनि सुनसरी जिल्ला विशेष मानिन्छ । त्यसमा पनि धरानले फुटबल खेलाडी उत्पादनमा अलग पहिचान बनाएको छ । त्यस्तो माहोलमा टेबल टेनिसबाट पनि पूर्वलाई चिनाउने सम्भावना देखाएकी छिन् दिक्षा दाहालले । परिवारको साथ पाएकोले आउने दिनमा अझै राम्रो गर्न सक्ने विश्वास उनले लिएकी छिन् ।

२०५९ पुसमा जन्मेकी दिक्षाले कक्षा ४ हुँदाबाट टेबल टेनिस खेल्न थालेकी हुन् । रहरै रहरले यसमा आक्रर्षित भएको उनी बताउँछिन् । ‘अरुले खेलेको देखेर खेल्न सकेकी हुँ उनले भनिन्,’ घर नजिक कर्भडहल छ । त्यहि दिदी दाईहरुले खेलेको हेर्दा हेर्दै म त्यहि रहरले म पनि खेलाडी बने ।’

अहिले उनी त्रिभुवन आर्मी क्लबमा आबद्ध छिन् । त्यसले उनको खेल जीवनमा नयाँ मोड लिएको मान्छिन् । दिक्षा महिला जुनियरतर्फकी वरियतामा नम्बर १ खेलाडी हुन् । त्यहाँ सम्म पुग्दाका लागि निकै मेहनत गर्नुपर्ने उनले सुनाइन् । भविष्यमा सिनियरमा पनि नम्बर १ हुने उनको लक्ष्य छ ।
२०६८ सालमा सूदुरपश्चिममा भएको छैटौं राष्ट्रिय खेलकुद दिक्षालले भाग लिएको पहिलो ठूलो प्रतियोगितामा हो । त्यसमा उनी सम्मिलित टोलीले कास्य पदक जितेको थियो । त्यो पहिलो सहभागितामा नै उनी आफ्नो प्रदर्शनबाट सिनियर प्रशिक्षकहरुको ध्यान तान्न सफल भइन् । त्यसअघि उनीसँग विराटनगरमा क्षेत्रिय प्रतियोगिता खेलेको अनुभव थियो ।

२०७३ को पुसमा आफ्नै क्षेत्र (पूर्व) मा सातौं राष्ट्रिय खेलकुद आयोजना हुँदा उनी त्यसको पनि हिस्सा बनिन् । सातौंमा उनले महिला एकलमा आर्मीकी स्वच्छा नेम्बाङसँग प्रिक्वार्टरफाइनल प्रतिस्पर्धा गरेकी थिइन् । उनी त्यसमा सफल त भइनन् । तर, उनको त्यो प्रदर्शनले धेरैको नजरमा पर्यो ।

त्यसपछि उनी आर्मीमा अनुबन्धित भइन् । ‘सातौंपछि आर्मी र एपिएफबाट पनि अफर आएको थियो,’ उनले स्मरण गरिन्, ‘मलाई आर्मीबाट खेल्न मन लाग्यो । मरो लागि खेल जीवनको त्यो एउटा टर्निङ प्वाइन्ट थियो । ‘

 

गत वर्ष प्रदेश ५ मा आठौं राष्ट्रिय खेलकुद प्रतियोगितामा उनी सम्मलित टोलीले कास्य पदक जितेको थियो । गएको मंसिरमै स्वदेशमा आयोजना भएको १३ औ दक्षिण एसियाली खेलकुद (साग) मा उनले देशको प्रतिनिधित्वको अवसर पाइन् । पदक त जित्न सकिनन् तर भविष्यका लागि राम्रो अनुभव भएको भने उनले बताइन् ।

गत वर्ष प्रथम एन्टा कप राष्ट्रिय जुनियर महिला टेबल टेनिस प्रतियोगितामा आर्मी क्लब च्याम्पियन बन्दाको क्षण उनलाई रमाइलो लाग्छ । पूर्वाञ्चलमा भएको कुनै पनि प्रतियोगिताको एकल र युगलमा उनी कहिल्यै दोस्रो भएकी छैनन् । क्षेत्रिय र विद्यालय खेलकुदमा कहिल्यै खाली हात नभएकी दिक्षा अबको दिनमा भने राष्ट्रिय हुँदै अन्तर्राष्ट्रिय प्रतियोगितामा पदक जित्ने सपना देखेकी छिन् ।

लगतारको प्रशिक्षण र मेहनतले एक दिन लक्ष्य प्राप्त हुनेमा उनी आशावादी छिन् । उनीबाट प्रशिक्षक विनोद शाक्यले पनि सफल नतिजाको अपेक्षा राखेका छन् । भारतको दार्जिलिङमा भएका प्रतियोगितामा भाग लिएकी दिक्षालाई त्यहाँ पनि पदक जितेको अनुभव छ । खेल्नकै लागि उनी पाकिस्तान पनि पुगिसकेकी छन् ।

उनको लक्ष्य अध्ययन र खेललाई सँगै लानेछ । ‘टेबल टेनिस खेलेर एक दिन राष्ट्रको नाममा पदक जित्ने लक्ष्य छ,’ उनले सुनाइन्,’ त्यसको लागि जति पनि मेहनत गर्न म तयार छु ।’ लजालु स्वभाविक दिक्षा टेबल टेनिसको विकास र नयाँ खेलाडीको आकर्षण बढाउनका लागि राष्ट्रिय खलकुद परिषद् र अखिल नेपाल टेबल टेनिस सँगले वातावरण बनाउनुपर्नेमा जोड दिन्छिन् ।