काठमाडौं (हाम्रो खेलकुद) – पोखराको सहारा क्लबको शाखा सहारा यूकेका पूर्व अध्यक्ष एवंम समाजसेवदी दीलिपकुमार गुरुङ बेलायतमा मेम्बर अर्डर अफ द ब्रिटिस एम्पायर (एमबिई) अवार्डबाट सम्मानित भएका छन् ।

बेलायतकी महारानी एलिजावेथ द्वितीयाको जन्मोत्सवका अवसरमा सामाजिक कार्यमा योगदान र्पुयाएबापत पूर्वगोर्खा सैनिक समेत रहेका गुरुङ सम्मानित हुने सूचीमा समावेश गरिएका थिए । गुरुङले बेलायती सेनामा २० वर्ष सेवा गरेका थिए ।

अनाथहरुका लागि फुटबल एकेडेमी सञ्चालन र आहा रारा गोल्ड कपको आयोजना पोखराको सहारा क्लबको मानार्थ सदस्य समेत रहेका गुरुङ विभिन्न समाजिक कार्यमा संलग्न रहँदै आएका छन् । उनी सहाराको यूके शाखाको पूर्व अध्यक्ष समेत हुन् ।

सैनिक सेवाबाट अवकाशपछि सामाजिक सेवामा खटिरहेका गुरुङ कोल्मा बहाकोट समाज यूकेका समेत अध्यक्ष रहि सकेका छन् । गुरुङले स्याङ्जास्थित कोल्मा बहाकोट पुख्र्यौली घरमा सांस्कृतिक संग्रहालय स्थापना गरेका छन् ।

गृह जिल्लामै युवालाई क्रियासिल गराउन फुटसल पनि सञ्चालन गरेका छन् । उनकै सक्रियतामा स्याङजा बिरुवाको ओरष्टेमा स्वास्थ्य केन्द्र पनि निर्माण भइरहेको छ । गुरुङ बेलायतमा रहेको द गोर्खा होटल रेस्टुरेन्ट एन्ड पप ब्ल्याक पुलका म्यानेजिङ डाइरेक्टर छन् ।

द गोर्खा होटल रेस्टुरेन्टबाटै उनले कोरोना भाइरस नियन्त्रणका लागि बेलायतभर लगाइएको लकडाउनमा भिक्टोरिया हस्पिटल ब्ल्याक पुलमा दुई महिनासम्म निस्शुल्क खाना खुवाएका बताइएको छ ।

ब्ल्याक पुलमा १० किलोमिटरको च्यारिटी दौडमा पनि १० पटकभन्दा बढी भाग लिइसकेका छन् । महारानीको जन्मोत्सवका अवसरमा कुल १ हजार ४ सय ९५ जनालाई दिइएको सम्मान पाउनेमा उनी एक्लो नेपाली मूलका व्यक्ति रहेको बताइएको छ ।