नेपालमा अहिलेसम्मकै सर्वाधिक पुरस्कार राशिको फुटसल लिग प्रतियोगिता यही असोज १० गतेदेखि सुरु हुने भएको छ । उपत्यकामा ठूला फुटबल मैदानको अभाव भएकाले फुटसलप्रति फुटबलप्रेमीको आकर्षण बढिरहेका बेला प्रतियोगिताले झनै प्रोत्साहन गर्ने ‘ए मुभमेन्ट टु एप्रिसियट’ (एएमए) इभेन्टका अध्यक्ष अशोक थापाले शुक्रबार आयोजित पत्रकार सम्मेलनमा बताए।

एएमए इभेन्टको आयोजनामा हुने प्रतियोगितामा १६ टोलीको सहभागिता रहने प्रतियोगिता संयोजक विवेक गौतमले सम्मेलनमा जानकारी दिए । उपत्यकाभित्रका १६ फुटसलको सहभागिता रहने प्रतियोगिता होम एण्ड अवेका आधारमा सञ्चालन हुनेछ । प्रतियोगितामा सहभागी टोलीलाई दुई समूहमा विभाजन गर्रिको छ । समूह एमा आदर्श फुटसल, बानेश्वर रिक्रियसन सेन्टर, बिजी ब्रदर्स, चउर रिक्रियसन सेन्टर, ढुकु फुटसल हव, हरिसिद्धि फुटसल, हाइवे फुटसल र इम्पोरियल फुटसल रहेका छन् । त्यस्तै समूह वीमा किकअफ फुटसल, कीर्तिपुर फुटसल, कुमारी फुटसल, रजनी फुटसल, सामाखुसी फुटसल, शंखमुल फुटसल, ताहाचल फुटसल र ह्वाइटहर्स फुटसलले प्रतिस्पर्धा गर्नेछन् । हरेक टोलीमा १२ जना खेलाडी, एक कोच र एक म्यानेजर रहनेछन् । प्रत्येक टिमले १४ खेल खेल्ने छन् । जसमा ७ खेल आफ्नो मैदान र ७ खेल अवे मैदानमा खेल्ने छन् ।
प्रतियोगिताको विजेता टिमले नगद १० लाख रुपैयाँ पुरस्कार पाउने छन् भने उपविजेताले नगद ५ लाख प्राप्त गर्ने छ । त्यस्तै उत्कृष्ट खेलाडी र गोलकिपरले ५० हजार पुरस्कार पाउने छन् । प्रतियोगिताको उद्घाटन खेल चउर रिक्रियसन सेन्टर र रजनी फुटसलवीच हुनेछ । त्यसपछि हरेक दिन कम्तीमा दुई खेल सञ्चालन हुने प्रतियोगिता संयोजक गौतमले जानकारी दिए । दशैं र तिहारको बिचमा भने प्रतियोगिता स्थगित हुनेछ । दशैंमा घटस्थापनादेखि असोज ३० गतेसम्म र तिहारमा लक्ष्मी पूजादेखि छठसम्म प्रतियोगिता स्थगित हुने गौतमले पत्रकार सम्मेलनमा बताए ।

रेडबुल मुख्य प्रायोजक रहेको प्रतियोगितामा फग बडी स्प्रे सहप्रायोजक रहेको छ । त्यसैगरी मेडिकल सपोर्टमा इजि केयर प्रालि, फ्याब्रिक प्रायोजकमा इलान्टेड वेयर र एजुकेशनल सर्भिसमा वियोड बाउन्ड्रिज रहेको छ । पत्रकार सम्मेलनमा आर्थिक संयोजक सौरभ केसी, फुटबलका चर्चित खेलाडी उपेन्द्रमान सिंह, हरि खड्कालगायतको उपस्थिति रहेको थियो ।