काठमाडौं (हाम्रो खेलकुद)– नागार्जुन नगरपालिकाको सहयोगमा नागार्जुन बक्सिङ खेलकुद समितिले अर्को महिना काठमाडौंमा वीर गणेशमान सिंह स्मृति बागमती प्रदेश स्तरीय बक्सिङ प्रतियोगिता आयोजना गर्ने भएको छ ।
महिला र पुरुषमा गरि १४ तौल समूह च्याम्पियनसिपमा राखिएको शुक्रबार आयोजित पत्रकार सम्मेलनमा नागार्जुनका मेयर समेत रहेका प्रतियोगिता संयोजक मोहनबहादुर बस्नतेले जानकारी दिए ।
प्रजातान्त्रिक आन्दोलनका सर्वमान्य नेता गणेशमान सिंहको स्मृतिमा आयोजना हुने प्रतियोगिताको महिलातर्फ ४८,५१,५४,५७,६० र ६४ केजी गरि ६ तौल समूहमा प्रतिस्पर्धा हुनेछ । त्यस्तै पुरुषतर्फ४९,५२,५६,६०,६९,७५ र ८१ गरि ८ तौल समूहमा प्रतिस्पर्धा हुने बताइएको छ ।
उपत्यकाका काठमाडौं, ललितपुर र भक्तपुरको क्लबहरुका खेलाडीले पनि भाग लिन पाउने प्रतियोगितामा बाँकी १० जिल्लाले भने जिल्लाबाट सहभागिता जनाउनुपर्ने बताइएको छ । एउटा टोलीले हरेक तौल समूहमा एक खेलाडी गरि बढीमा १४ खेलाडीले भाग लिन पाउनेछन् ।
उपत्यका तीन जिल्लाबाहेकका खेलाडीलाई आयोजकले आवास र खानाको व्यवस्था गर्ने बताइएको छ । हरेक तौल समूहको विजेताले १०, दास्रो हुने खेलाडीले ७ तथा सेमिफाइनल पुग्ने दुई खेलाडीले समान ४ हजार रुपैयाँ प्राप्त गर्नेछन् ।
प्रतियोगितामा झन्डै ३० लाख रुपैयाँ खर्च हुने अनुमान गरिएको र त्यसमा २० लाख रुपैयाँ नागार्जुन नगरपालिकाले उपलब्ध गराउने मेयर बस्नेतले जानकारी दिए । प्रतियोगिताको उत्कृष्ट खेलाडी पुरुषलाई आयोजकले मोटरसाइकल र उत्कृष्ट महिला खेलाडीलाई मेयर बस्नेतले व्यक्तिगत रुपमा स्कुटर पुरस्कार दिने घोषणा गरे ।
