काठमाडौं (हाम्रो खेलकुद) – नेपाल ब्याडमिन्टन संघले सार्वजनिक गरेको राष्ट्रिय खेलाडीको नयाँ वरियतामा तामाङ दिदीभाई नङ्सलदेवी तामाङ र रत्नजित तामाङ शीर्षस्थानमा यथावत रहेका छन् ।

हरेक ३–३ महिनाको अन्तरालमा शीर्ष आठ खेलाडीको वरीयता निर्धारण गर्ने संघको नीति अनुसार आइतबार सार्वजनिक गरेको वरियतामा तामाङ दिदीभाई महिला र पुरुषमा शीर्ष स्थानमा यथावत रहेको हुन् । त्रिभुवन आर्मीका रत्नले १७४०० अंक प्राप्त गरे । पुरुषमा नेपाल प्रहरी क्लबका दीपेश धामी (१२६३५), भोजपुरका विकास श्रेष्ठ (१२०५०), नेपाल एपीएफ क्लबका साजनकृष्ण ताम्राकार (११६४५), प्रहरीका विष्णु कटुवाल (१०५१५), एपीएफका सुदीप सेढाईं (९३२५), कैलालीका सन्जिव खड्का (८६५५) र प्रहरीका दीपक बोहरा (८२६५) क्रमशः दोश्रोदेखि आठौं स्थानमा छन् ।

यस्तै महिलातर्फ आर्मीकी नङशल तामाङ ११६४० अंकसहित पहिलो स्थानमा छिन् । त्यस्तै महिलामा आर्मीकात्रय अमिता गिरी (६६७०) दोश्रो, सरादेवी तामाङ (६१४०) तेश्रो र अनुमाया राई (४८०५) चौथो, एपीएफकी शिक्षा श्रेष्ठ (४६५०) पाँचौं, कास्कीकी पुनम गुरुङ (४१५०) छैटौं, एपीएफकी शोभा गौचन  (३७४५) सातौं तथा जेस्त ब्याडमिन्टन क्लबकी सुनैना मुखियाँ (३४५५) आठौं स्थानमा छन् ।  राष्ट्रिय प्रतियोगिता तथा ब्याडमिन्टन संघले मान्यता दिएको ‘क’ श्रेणीको प्रतियोगितामा गरेको प्रदर्शनका आधारमा खेलाडीको वरीयता निर्धारण गरिएको संघका सचिव नवीनविक्रम शाहले जानकारी गराए ।