हिमाल खरेल, बिर्तामोड
बडा दशैंको अवसर पारेर झापाको बिर्तामोड नगर खेलकुद विकास समितिले गर्ने अन्तर वडा फुटबल प्रतियोगिताको तयारी पूरा भएको छ ।
असोज १४ गतेदेखि हुने भनिएको पाँचौँ संस्करणको प्रतियोगिता असोज १६ गतेदेखि २३ गतेसम्म हुने समितिका उपाध्यक्ष तथा प्रतियोगिता संयोजक सन्तोष गुरुङले बताए ।
बिर्तामोड नगरपालिकाका १० वटा वडाहरुबीच हुने प्रतियोगिता यो वर्ष सैनिक बजारमा रहेको महेन्द्रज्योति माविको खेल मैदानमा हुनेछ ।
प्रतियोगिताको विजेताले उपाधिसहित १ लाख र दोस्रो हुने टोलीले ५० हजार रुपैयाँ प्राप्त गर्ने समिति सदस्य विशाल अग्रवालले बताए ।
त्यस्तै, सर्वोत्कृष्ट खेलाडीले १० हजार रुपैयाँ र ट्रफी पाउँदा प्रत्येक खेलका प्लेयर अफ द म्याचले २ हजार रुपैयाँ ट्रफी पाउने छन् ।
विधागत रुपमा उत्कृष्ट गोलकिप्पर, डिफेन्डर, मिडफिल्डर र फरवार्डले ५ हजार रुपैयाँ र ट्रफी पाउने अग्रवालले जानकारी दिए ।
प्रतियोगिता सम्पन्न गर्न ८ लाख ४६ हजार रुपैयाँ लाग्ने अनुमान गरिएको समितिले जनाएको छ ।
