काठमाडौं (हाम्रो खेलकुद) – क्रोएसियामा सम्पन्न आइएसएफ विश्व स्कुल यु–१५ च्याम्पियनसिप भलिबलमा फेयर प्ले अवार्ड हात पारेको नेपाली युथ टोली आइतबार स्वदेश फर्किएको छ ।
नेपाली युथ टोली आइतबार राति ९ बजे त्रिभुवन अन्तर्राष्ट्रिय विमान स्थलमा ओर्लिएको हो ।
नेपालले एक खेलमा जित हात पारेपनि उत्कृष्ट र मन जित्ने प्रदर्शन गरेको भन्दै आयोजकले फेयर प्ले अवार्ड प्रदान गरेको थियो । महिला स्पर्धामा २२ राष्ट्रले सहभागिता जनाएको थियो ।
नेपाली भलिबल इतिहासमै पहिलोपटक उमेर समूहको अन्तर्राट्रिय भलिबल प्रतियोगिता आइएसएप वल्र्ड स्कुल भलिबल च्याम्पियनसिप खेल्ने मौका पाएको हो ।
सन् १९७२ देखि सुरु भएको यस प्रतियोगिताका लागि इन्टरनेशनल स्कुल अफ स्पोर्टस् फेडेरेसन (आइएसएफ) ले नेपाल स्कुल स्पोर्टस् फेडेरेसन (एनएसएफ) सँग समन्वय गरेपछि नेपालको सहभागिता निश्चित भएको हो ।
९ खेलाडीसहितको १४ सदस्यीय टोली एक साताअघि प्रतियोगिता स्थल क्रोएसिया पुगेको थियो। नेपाली टोलीमा सबै न्यु डायमन्ड एकेडेमीका खेलाडी रहेका थिए ।
