चितवन (हाम्रो खेलकुद) – दुई विभागीय टोली त्रिभुवन आर्मी क्लब र नेपाल पुलिस क्लब चितवनको रत्ननगरमा जारी अन्तर्राष्ट्रिय आमन्त्रण पुरुष भलिबल प्रतियोगिताको फाइनलमा प्रवेश गरेका छन् ।
बुधबार भएको पहिलो सेमिफाइनलमा पुलिसले भारतको तालिमनाडुलाई ३–२ को प्रतिस्पर्धात्मक सेटमा पराजित गर्दै उपाधिनजिक पुगेको हो । निकै प्रतिस्पर्धात्मक खेलमा पुलिसले सुरुवाती दुई सेट २५–१७ र २५–१५ ले जित्दै खेल आफ्नो पक्षमा पारेको थियो । त्यसपछिको दुवै सेट पुलिसले १७–२५ र १९–२५ ले गुमाएपछि खेल २–२ को बराबरीमा पुगेको थियो । निर्णायक सेटमा पुलिस १५–११ ले विजयी हुन सफल भयो ।
पञ्चरत्न युवा क्लबको आयोजनामा वैरिया माध्यमिक विद्यालयमा बुधबारै भएको अर्काे सेमिफाइनलमा आर्मीले बंगलादेशको टिटास क्लबलाई ३–० को सोझो सेटमा पराजित गर्दै फाइनलमा पुलिससँगको भेट पक्का गर्यो । आर्मीले पहिलो सेटमा २८–२६ को संघर्षपुर्ण जित निकालेको थियो । दोस्रो सेटमा २५–१९ को सहज जित निकालेपनि तेस्रो सेट आर्मीले २७–२५ ले जित्न सफल भयो ।
प्रतियोगिताको विजेताले ३ लाख र उपविजेताले १ लाख ५० हजार रुपैयाँ पुरस्कार प्राप्त गर्नेछन् ।
