अर्जुन कार्की, बागलुङ
चैत्राष्टमी मेलाको अवसरमा आयोजना गरिएको कालिका कप भलिबल प्रतियोगितामा बिहीबार चार खेल सम्पन्न भएका छन् । लिगकम नकआउट सिष्टममा खेलाइएको प्रतियोगितामा बिहीबार सिद्धार्थ आँखा घर छन्त्याल कन्ट्रक्सन, काठेखोला गाउँपालिका, बागलुङ भलिबल ट्रेनिङ सेन्टर र नेपाली सेनाको २३ नम्बर बाहिनी विजयी भएका छन् ।
पहिलो खेलमा सिद्धार्थ आँखा घर छन्त्याल कन्ट्रक्सनले ३—२ को सेटमा अनेरास्ववियुलाई पराजित गरेको छ । पहिलो दुई सेट हारेर दबाब परेका छन्त्याल कन्ट्रक्सनले उत्कृष्ट पुनरागमन गर्दै खेल जित्यो । कन्ट्रक्सनले अनेरास्ववियलाई २५–२३, २५–१९, २०–२५, २१–२५ र ६–१५ को सेटमा पराजित गर्यो ।
यस्तै दोस्रो खेलमा काठेखोला गाउँपालिकाले जिल्ला प्रहरी कार्यालय बागलुङलाई ३–१ के सेटमा पराजित गर्यो । काठेखोलाले पुलिसलाई २०–२५, २६–२४, २५–१३ र २५–१७ को सेटमा पराजित गरेको थियो । बिहीबारको तेस्रो खेलमा बागलुङ भलिबल ट्रेनिङ सेन्टरले बागलुङलाई ३—२ सेटले जितेको छ । २—० ले पछि परेको अवस्थाबाट कमव्याक गर्दै बागलुङ भलिबल ट्रेनिङ सेन्टरले नतिजा आफ्नो पोल्टामा पारेको हो ।
पहिलो सेट २५—२३ र दोस्रो सेट २५—१८ ले बागलुङले जित्दा भलिबल ट्रेनिङ सेन्टरले तेस्रो सेट २५—२२, चौथो सेट २५—२० र पाँचौं सेट १५—१० ले जित्यो । यस्तै बिहीबारको अन्तिम खेलमा नेपाली सेनाको २३ नम्बर बाहिनी बागलुङले सिगानालाई सोझो सेटमा पराजित गरेको छ । बाहिनीले सिगानालाई २५—१२, २७—२५ र २५—१९ को सोझो सेटमा पराजित गर्यो ।
कालिका भगवती गुठी व्यवस्थापन समितिले आयोजना गरेको चैत्राष्टमी मेला–२५ मा आयोजना गरिएको कालिका कप भलिबल प्रतियोगितामा ८ समूह सहभागी छन् । कालिका कप भलिबल प्रतियोगितामा प्रथम हुने टिमले नगद एक लाख ५१ हजार हात पार्नेछ । दोस्रो हुने समुहले एक लाख एक हजार तथा तेस्रो हुने टिमले ५१ हजार पुरस्कार पाउनेछन् । प्रतियोगिताका उत्कृष्ट खेलाडीलाई पनि पुरस्कारको व्यवस्था गरिएको मूल आयोजक समितिका सदस्य–सचिव कुमार खड्काले जानकारी दिए ।
