काठमाडौं (हाम्रो खेलकुद) – साविकको विजेता होङग्वान्जी न्यु डायमन्ड एकेडेमीको ‘ए’ टोली र थ्री स्टार एकेडेमी दोस्रो चन्द्रागिरी उपमेयर कप अन्तर विद्यालयस्तरीय खुल्ला छात्रा भलिबल प्रतियोगिताको सेमिफाइनलमा प्रवेश गरेका छन् ।

होङग्वान्जी न्यु डायमन्डले क्वाटरफाइनलमा स्प्रिङडेलबाट वाकओभर पाएपछि खेल्दै नखेली अन्तिम चारमा पुग्न सफल भएको हो । बस दुर्घटना भएपछि स्प्रिङडेलले प्रतयोगितामा सहभागिता जनाएन ।

अर्काे क्वाटरफाइनलमा थ्री स्टार एकेडेमीले परोपकार आदर्श माध्यमक विद्यालयको ‘बी’ टोलीलाई २–१ को सेटमा पराजित गर्दै सेमिफाइनलको यात्रा तय गर्न सफल भयो । थ्री स्टारले पहिलो सेट २५–१७ ले जितेको थियो । दोस्रो सेट परोपकारले २५–२० ले जितेपछि खेल १–१ सेटको बराबरीमा पुगेको थियो । निर्णायक सेटमा थ्री स्टार २५–१६ ले विजयी हुन सफल भयो ।

अब न्यु डायमन्ड ‘ए’ ले फाइनल प्रवेशका लागि शुक्रबार हुने विजेश्वरी र डायमन्ड ‘बी’ को वजेतासँग खेल्नेछ । थ्री स्टारले अब सेमिफाइनलमा पारामाउन्ट र ज्ञानसुधाबीचको विजेतासँग प्रतिस्पर्धा गर्नेछ । बिहीबार भएको समूह ‘डी’ को अन्तिम खेलमा न्यु डायमन्डको ‘बी’ टोलीले परोपकारको ‘ए’ टोलीलाई २५–१२ र २५–१५ ले पराजित गर्दै समूह उपविजेता बन्दै क्वाटरफाइनलमा स्थान बनाएको छ । बिहीबारै भएको अर्काे खेलमा पारामाउन्टले परोपकार आदर्श माध्यमिक विद्यालयको ‘ए’ टोलीलाई २५–९ र २५–८ ले सहजै पन्छाउदै अन्तिम आठमा पुग्न सफल भयो ।

प्रतियोगितामा शुक्रबार क्वाटरफाइनलको बाँकी रहेको दुई खेल र सेमिफाइनलका खेल हुनेछ ।
मदन भण्डारी स्पोर्टस् एकेडेमी चन्द्रागिरी नगर कमिटिले भलिबल नेपालको राष्ट्रिय खेल भएको दिनलाई विशेष बनाउने उद्देश्यले गत वर्षदेखि खुल्ला छात्रा भलिबल प्रतियोगिता आयोजना गरेको हो ।

१० टोलीको सहभागिता रहेको प्रतियोगिताको विजेताले ६० हजार नगदसहित शिल्ड, मेडल र प्रमाणपत्र प्राप्त गर्नेछन् । यस्तै दोस्रो र तेस्रो हुनेले क्रमश ३० हजार, १५ हजारनगदसहित शिल्ड, मेडल र प्रमाणपत्र प्राप्त गर्नेछन् । चौथो हुनेले १० हजार रुपैया प्राप्त गर्नेछन् । सर्वाेत्कृष्ट खेलाडी १ हजार ५ सय र व्यक्तिगत विधातर्फ (स्पाइकर, ब्लकर, सर्भर, डिफेन्डर, सेटर) लाई १ हजार रुपैया पाउनेछ । पहिलो संस्करणमा न्यु डायमन्ड एकेडेमी च्याम्पियन बनेको थियो ।