काठमाडौं (हाम्रो खेलकुद) – उर्जन श्रेष्ठ फ्रेन्ड्स क्लबको मुख्य प्रशिक्षक बनेका छन् । फ्रेन्ड्सल नयाँ सिजनका लागि उर्जनलाई मुख्य प्रशिक्षकमा नियुक्त गरिएको जनाएको छ ।

रेलिगेसन विनाको लिगमा ब्रिगेड ब्वाइज क्लब (बीबीसी) को मुख्य प्रशिक्षक रहेका उर्जनले गत सिजन थ्री स्टारको प्रशिक्षण सम्हालेका थिए । थ्री स्टार गत सिजन लिगमा छैटौं भएको थियो । थ्री स्टारले नयाँ सिजनको लागि मेघराज केसीलाई मुख्य प्रशिक्षक बनाइसकेको छ ।

गत वर्ष मृगेन्द्र मिश्रले फ्रेन्ड्सको प्रशिक्षण सम्हालेका थिए । गत सिजन फ्रेन्ड्स सुरुवाती समयमा रेलिगेसनको संघारमा पुगेपनि टोलीले त्यसपछि सानदार प्रदर्शन गर्दै रेलिगेसन जोगाएको थियो ।

‘ए’ डिभिजन लिगको मिति नजिकिदै गर्दा सबै १४ टोलीले खेलाडी अनुबन्धसँगै प्रशिक्षक अनुबन्धलाई तीब्रता दिइरहेको छ । मंगलबार मात्रै फ्रेन्ड्सले संकटाका डिफेन्डर अमित तामाङ र श्याम बाबु क्याप्छकीलाई अनुबन्ध गरेको छ ।

यसअघि फ्रेन्ड्सले डोना थापा, विशाल सुनार, राजेश परियार र रुपेश केसीलाई अनुबन्ध गर्दा एरोन थापा, प्रेम भण्डारी र असिम भुषालसँगको सम्झौता नविकरण गरेको छ ।

यो सिजनको लिग फागुन १९ गतेबाट सुरु हुँदैछ । १४ टोलीले डबल राउन्ड रोविनको आधारमा २५ जेठसम्म प्रतिस्पर्धा गर्नेछ । फ्रेन्ड्सले नवप्रवेशी एफसी खुमलटारसँग खेल्दै नयाँ सिजनको सुरुआत गर्नेछ ।