दिपेश तिमल्सिना
काकड्डभित्ता (हाम्रो खेलकुद)– हिमालयन शेर्पा क्लब झन्डै चार बर्षपछि घरेलु फुटबलको प्रतिस्पर्धा खेलमा फर्कदै छ । काड्डभित्तामा शनिबार सुरु हुने दोस्रो काकड्डभित्ता गोल्डकपको उद्घाटन खेलमा हिमायन शर्पा र घरेलु झापा ११ को सामना गर्नेछ ।

२०६९ को लिगपछि अखिल नेपाल फुटबल संघ (एन्फा) आन्तरिक विवादमा फसेपछि हिमालयन शेर्पा प्रतिस्पर्धात्मक फुटबल खेलबाट अलग भएको थियो । लिगको पुरस्कार रकम नदिएको भन्दै चार क्लबले एन्फाविरुद्ध आन्दोलन सुरु गरेपछि एन्फाले हिमालयन शेर्पासहित चार क्लबलाई खेल्न प्रतिबन्ध लगाएको थियो । केही महिनाअघि मात्र एन्फाले हिमालयन शेर्पा र फ्रेन्ड्समाथिको प्रतिबन्ध हटाएको थियो । सरस्वती क्लब र मच्छिन्द्रको भने त्यो भन्दाअघि नै हटाएको थियो ।
चार बर्षपछि प्रतिस्पर्धात्मक खेलमा फर्कदा हिमालयन शेर्पामा किशोर गिरी, माउसा कमागाटे, आशिष गुरुङ, भुपाल गुरुङ, मानबहादुर तामाङ,हेमन गुरुङ, रुपेश केसी, आशिष लामा, विश्वास श्रेष्ठ, विकास पुन, राजबाबु, पुकार गहतराज, सुरज हमाल, त्रिदेव गुरुङ, युसुफ र विशाल गुरुङ टोलीका खेलाडी छन् । टोलीको प्रशिक्षकमा विकास गौचन छन् ।
स्थानिय टोली झापा भने घरेलु फुटबलमा मोफोसलबाट बलियो टोलीको रुपमा छवि बनाउँदै गरेको छ । योगेश गुरुङ, विशाल राई, बुद्ध चेम्जोङलगायतका खेलाडी टोलीमा छन् । युवा तथा खेलकुद मन्त्री दलजित श्रीपालीले प्रतियोगिताको उद्घाटन गर्दैछन् । प्रतियोगिताको विजेता टोलीले ४ लाख रुपैयाँ प्राप्त गर्नेछ ।