एजेन्सी – ला लिगका शीर्ष २ टोली बार्सिलोना र रियल म्याड्रिडबीच आज राती एल क्लासिको हुँदैछ । खेल नेपाली समय अनुसार राती १:४५ बजे सुरु हुनेछ । घरेलु मैदानमा हुने खेलमा रियललाई हराउन सके बार्सिलोनाले ला लिगा उपाधि जित्ने सम्भावनालाई थप बलियो बनाउनेछ ।

२५ खेलको समाप्तीमा शीर्षस्थानको बार्सिलोनाको भन्दा दोस्रो स्थानको रियलको ९ अंक कम छ । बार्सिलोनको ६५ र रियलको ५६ अंक छ । रियलसँग भने बार्सिलोनासँगको अंक दुरीलाई ६ अंकमा घटाउने मौका छ ।

बार्सिलोनाले पेद्री र ओसमाने डेम्बेलेविना सुरुवात गर्ने सम्भावना छ । चोटका कारण उनीहरु खेल्ने छैनन् । चोटकै कारण डेभिड अल्बा विना नै रियलले बार्सिलोनाविरुद्ध खेल्नुपर्नेछ । अल्भारो रोड्रिगुइज प्रतिबन्धका कारण बार्सिलोनाविरुद्धका खेलमा हुनेछनन् ।

च्याम्पियन्स लिगमा समान्य चोट लागेपनि करिम बेन्जेमा भने बार्सिलोनाविरुद्ध सुरुवाती ११ मा खेल्ने सम्भावना छ । बेन्जेमाकै गोलमा च्याम्पियन्स लिगको दोस्रो लेगमा रियलले लिभरपुललाई १–० ले हराएको थियो । भिनिसियस जुनियरको पासमा बेन्जेमाले गोल गरेका थिए । एल क्लासिकोमा पनि भिनिसियबाट उच्च प्रदर्शनको अपेक्षा गरिएको छ ।

पछिल्ला केहि खेलमा संघर्ष गर्नु परेपनि भिनिसियसबाट सधै अपेक्षा रहने रियलका प्रशिक्षक कार्लो एन्सेलोटीले बताएका छन् । यो वर्ष बार्सिलोनाले दुई पटक रियल माथि जित हासिल गरिसकेको छ । जनवरीमा स्पेनिस सुपर कप फाइनलमा र यसै महिना भएको कोपा डेल रे सेमिफाइनलको पहिलो लेगमा बार्सिलोना १–० ले विजयी भएको थियो । सेमिफाइनलको दोस्रो लेग क्याम्प नोउमा अप्रिल ५ मा हुनेछ ।

अक्टुबरमा भएको एल क्लासिकोमा भने रियल ३–१ ले विजयी भएको थियो । बार्सिलोनाका प्रशिक्षका जाभीले भने दुवै टोलीले जित्ने सम्भावना बराबर रहेको बताएका छन् । ‘उनीहरु बलियो छन् । पछिल्लो समय झनै बलियो छैन, उनले भनेका छन्,‘ जनवरीमा भन्दा पनि उनीहरु शारीरिक रुप थप मजबुद छन् । मलाई लाग्छ उनीहरुले हाम्रो रक्षापक्तिमाथि दबाब दिनेछन् ।’

च्याम्पियन्स लिगमा उच्च प्रर्दशन गरिरहेको प्रसंगलाई पनि जाभीले स्मरण गरेका छन् । रियल म्याड्रिड युरोपियन च्याम्पियन टोली हो । पछिल्ला खेल पनि सहजै जितेको थियो, उनले भने,‘मलाई लाग्छ खेल प्रतिस्पर्धात्मक हुनेछ । हामीले जित्ने ५० प्रतिशत सम्भावना छ ।’