दिपक न्यौपाने, बुटवल
थ्री स्टार क्लब २२ औं तिलोत्तमा गोल्ड कप फुटबल प्रतियोगिताको सेमिफाइनलमा प्रवेश गरेको छ । अर्को ए डिभिजन टोली हिमालयन शेर्पा क्लबलाई आइतबार १–० ले हराउँदै थ्री स्टार अन्तिम चारमा पुगेको हो ।

दिपेश गुरुङले खेलेको अन्त्यतिर गरेको गोल खेलको निर्णय बनेको थियो । दिपेशले निर्धारित समय सकिनु ५ मिनेट अघि गोल गरेका थिए । पेनाल्टी बक्सबाट उनले गरेको प्रहार गोलमा परिणत भएको थियो । उनको प्रहारब रोक्न हिमालयनकाब गोलकिपर विवश चौधरीले मौका पाएनन् ।

पहिलो हाफमा दुवै बटोलीले सन्तोषजनक प्रदर्शन गर्न सकेनन् । पूर्व राष्ट्रिय खेलाडी विक्रम लामाको कप्तानीमा उत्रिएको थ्री स्टारका लागि २५ औ मिनेटमा आदित्य शाक्यको लामो पासमा अजय मार्टिन्सले हेड गरेपनि बललाई पोष्टको दिशा दिन सकेनन् ।

त्यसअघि हिमालयन शेर्पा योमीले पेनाल्टी बक्सबाट हेडमार्फत गरेको प्रहार सफल भएन । दोस्रो हाफमा योमीको प्रहार बारमा लागेर फर्कियो । दोस्रो हाफमा थ्री स्टारले प्रदर्शनमा केहि सुधार गरेको थियो । ६० औं मिनेटमा थ्री स्टारका आदित्य शाक्यको प्रहार गोलपोष्ट नजिकबाट बाहिरियो ।

थ्री स्टारका दिपेश खेलको म्यान अफ दी म्याच घोषित भए । उनलाई प्रदेश खेलकुद विकास परिषद् लुम्बिनीका सदस्य सचिव जयप्रकाश भट्टराईले ११ हजार रुपैयाँ हस्तान्तरण गरे । थ्री स्टारले बुधबार सेमिफाइनलमा सुदूरपश्चिम ११ स्पोर्टस क्लबको सामना गर्नेछ ।

हिमालयन शेर्पाका प्रशिक्षक सुमन श्रेष्ठले रेफ्रिले सन्तोषजनक खेल खेलाउन नसकेको बताए । २० औं संस्करणको विजेता थ्री स्टारका प्रशिक्षक मेघराज केसीले दोस्रो हाफको रणनीतिले काम गरेर नतिजा निस्केको बताए । उनले अबको ध्यान सेमिफाइनलमा केन्द्रित हुने जनाए । रुपन्देही जिल्ला फुटबल संघले आयोजना गरेको प्रतियोगितामा सोमबार दुई ए डिभिजन टोली फ्रेन्डस क्लब र एपिएफब फुटबल क्लबबीच हुनेछ । फ्रेन्ड्स १५ औं संस्करणको विजेता हो ।

तिलोत्तमा गोल्डकपको विजेताले उपाधिसहित ११ लाख ११ हजार १ सय ११ तथा दोस्रो हुने टोलीले ५ लाख ५५ हजार ५ सय ५५ रुपैयाँ प्राप्त गर्नेछ । प्रतियोगिताका सर्वोत्कृष्ट खेलाडीले मोटरसाइकल तथा विधागत उत्कृष्ट खेलाडीले समान ३० हजार रुपैयाँ प्राप्त गर्नेछन् ।