एजेन्सी – इंग्लिस फरवार्ड बुकायो साकाले दुई गोलसँगै एक असिस्ट प्रलान गरेपछि शीर्षस्थानमा रहेको लन्डन क्लब आर्सनलले इंग्लिस प्रिमियर लिगमा सानदार जित दर्ता गरेको छ ।

घरेलु मैदानमा आर्सनलले क्रिस्टल प्यालेसमाथि ४–१ को फराकिलो जित निकाल्दै आफ्नो शीर्षतालाई थप मजवुत बनाएको छ ।इमिरेट्स स्टेडियममा आइतबार राति भएको खेलमा आर्सनलको सहज जितमा बुकायो साकाले दुई तथा गाब्रिएल मार्टिनेली र ग्रानिट झाँकाले समान एक गोल गरे । प्यालेसका जेफरे स्कलपले एक गोल फर्काए ।

खेलको २८औं मिनेटमा मार्टिनेलीको गोलबाट आर्सनलले १–० को अग्रता लिन सफल भयो । मार्टिनेलीले बुकायो साकाको पासमा गोल गर्न सफल भएका थिए । ४३औं मिनेटमा बुकायो साकाले बेन ह्वाइटको पासमा गोल गरेपछि आर्सनलले पहिलो हाफमा २–० को अग्रता लिन सफल भयो ।

५५औं मिनेटमा ग्रानिट झाँकाले गोल गर्दै आर्सनललाई सहज जिततर्फ अघि बढाए । उनले लियान्द्रो ट्रोससार्डको पासमा गोल गर्न सफल भएका थिए । ६३औं मिनेटमा जेफरेले गोल गर्दै खेललाई ३–१ को स्थितिमा ल्याए ।

त्यसपछि ७४औं मिनेटमा बुकायो साकाले काइरन टाइएरनीको पासमा व्यक्तिगत दोस्रो तथा टोलीका लागि चौथो गोल गर्दै आर्सनलको सानदार जित पक्का गराए ।

यस जितसँगै आर्सनलले शीर्षस्थानमा ८ अंकको अग्रता बनाउन सफल भएको छ । आर्सनलको २८ खेलबाट ६९ अंक पुगेको छ । एक खेल कम खेलेको म्यानचेस्टर सिटीको ६१ अंक छ । पराजित प्यालेस २७ अंक जोडेर १२औं स्थानमा छ ।