दिपेन्द्र पोखरेल

काठमाडौं – राष्ट्रिय टोलीका स्ट्राइकरद्वय बिमल घर्तीमगर र अन्जन विष्ट स्पेन जाने भएका छन् । अन्जन सोमबार त्यसतर्फ जाने तयारीमा छन् भने बिमल केही दिन पछि मात्र जाने भएका छन् । दुवै स्पेनको मार्बेला युनाइटेड एफसीमा रहेर अभ्यास गर्ने र मिले सम्म ट्रायल दिनका लागि त्यसतर्फ जान लागेका हुन् ।

मार्बेला त्यहि क्लब हो जसमा अन्जन र राष्ट्रिय टोलीका रक्षक अनन्त तामाङले गत बर्ष केही साता अभ्यास गर्नुका साथै केही मैत्रीपूर्ण खेल खेलेका थिए । गत बर्ष फागुनमा मार्बेलाले नेदरल्यान्ड्स पुगेर मैत्रीपूर्ण खेल खेलेका थिए । त्यति बेला बिमललाई पनि अभ्यासका लागि बोलाइएपछि उनी चोटका कारण गएनन् । यसपटक अनन्त त्यसतर्फ जाने छैनन् । एएफसी सोलिडारिटी कपका दौरान अनन्तको घुँडामा चोट लागेको थियो । गत महिला घुँडाको शल्यक्रिया गराएका उनी अहिले आराम गरिएका छन् ।

यसपटक अन्जन र बिमलमात्र त्यसतर्फ जाँदैछन् । विगतमा जस्तै अहिले पनि लुइस डी ब्रायजले उनीहरुको अभ्यासको व्यवस्था मिलाएका हुन् । व्यक्तिगत कारणले बिमलले अर्को सातामात्रै जाने हाम्रो खेलकुद डटकमलाई जानकारी दिए । स्पेन यात्रालाई लिएर अन्जन उत्साहित छन् । ‘हामीले पहिला पनि त्यहाँ गएर अभ्यास गरिसकेका छौं’ उनले भने,‘अहिले फेरी मौका मिलेको छ । त्यहाँको वातावरण र अभ्यास हाम्रो भन्दा धेरै स्तरीय छ । त्यहाँ अभ्यास गर्ने मौका मिल्नु व्यक्तिगत रुपमा मलाई फाइदा हुन्छ नै सँगै समग्रमा हाम्रो राष्ट्रिय टोलीलाई नै फाइदा पुग्नेछ । यो हाम्रो लागि सिक्ने अवसर हो ।’

कुनै क्लबमा ट्राइयल जाने भन्ने त्यहि पुगेपछि मात्र थाहा हुने अन्जनले सुनाए । ‘हाम्रो प्रदर्शनलाई त्यहाँका क्लबहरुले पछ्याइरहेको भन्ने बताइएको छ’ उनले भने, ‘तर, अहिले कुन क्लबमा ट्रायल दिने भन्ने प्रष्ट छैन । उतै पुगेपछि मात्र थाहा हुनेछ ।’ दुई वर्षअघि बेल्जियमको माथिल्लो डिभिजनको क्लब एफसी ट्वान्टेको एकेडेमीमा विमललाई ट्रायलको अवसर पनि लुइसले नै मिलाएका थिए । लुइस बेल्जियन एजेन्ट हुन् । गत वैशाखमा उपचारका लागि बेल्जियम पुगेका बिमल बिहिनी मनीषाको मृत्युपछि स्वदेश फर्केका थिए । त्यसपछि लामो समय मैदान बाहिर रहेका बिमल केही महिनाअघि मात्र सक्रिय फुटबलमा फर्केका थिए ।

मार्बेला युनाइटेड युएस सकर एकेडेमीको शाखाको रुपमा स्पेनको मालागामा स्थापित क्लब हो । सुरुमा युएस सकरकै नाममा स्थापना गरिए पनि २०१४ मा मार्बेला युनाइटेड एफसी नाम राखिएको क्लबको बेभसाइटमा उल्लेख छ । नेपालले पछिल्लो डेढ बर्षमा फुटबलमा चारवटा उपाधि जितेको थियो ।

अन्जन र बिमल नेपालले प्राप्त गरेका सबै सफलता दिलाउने टोलीका सदस्य हुन् । गत भदौमा काठमाडौंमा साफ यु–१९ उपाधि उचालेको नेपालले माघमा बंगलादेशमा बंगबन्धु गोल्डकप जितेको थियो भने यु–२३ टोलीले फागुनमा भारतमा १२ औं दक्षिण एसियाली खेलकुद (साग) अन्तर्गत फुटबलमा स्वर्ण पदक जितेको थियो । सबैभन्दा ठूलो सफलताका रुपमा अन्जन र बिमलसहितको टोलीले झन्डै दुइृ महिनाअघि मलेसियामा सोलिडारिटी कप जितेको थियो ।