सिमरा (हाम्रो खेलकुद)– गत महिना टुबोर्ग हेटौडा गोल्ड कप फुटबल प्रतियोगिताको उपाधि उचालेको आर्मीले रुस्लान आठौं सिमरा गोल्डकप फुटबल प्रतियोगिताको दोस्रो सेमिफाइनलमा हिमालयन शेर्पाको सामना गर्दैछ । अब केही समयमा सुरु हुने खेलको विजेताले शनिबार सिएमजी क्लब संकटासँग फाइनल खेल्नेछ ।

सोझै क्वार्टरफाइनलमा प्रवेश पाएको आर्मीले वीरगन्ज युथ युनाइटेडलाई ३–० ले र हिमालयन शेर्पाले रुपन्देहीलाई १–० ले हराएर एकअर्कासँगको भेट पक्का गरेको थियो । सेमिफाइनलमा आर्मीसँग गोलकिपर विकेश कुथुको साथ रहने छैन । अघिल्लो खेलमा उनको टाउकोमा चोट लागेपछि उनी आराम गरिरहेका छन् ।
आर्मी बर्षको छैटौं फाइनल प्रवेशका लागि प्रयासरत रहँदा झन्डै तीन बर्षपछि सक्रिय फुटबलमा फर्केको हिमालयन शेर्पा लयमा फर्कने प्रयासमा हुनेछ । यसअघिका ५ फाइनल खेलेको आर्मीले ३ मा उपाधि जितेको थियो भने दुईमा उपविजेतामा चित्त बुझाएको थियो । गत महिना हेटौडामा च्याम्पियन बनेपछि भने आर्मी फाइनल पुग्न सकेको छैन ।
हेटौडापछि सुदूरपश्चिमाञ्चल गोल्डकपको पहिलो खेलमै पराजित आर्मी त्यसपछि आहा रारा गोल्डकप र गत साता रमपम झापा गोल्डकपको सेमिफाइनल भन्दा अघि बढ्न सकेन । बिहीबारको खेल जित्नेले कम्तीमा २ लाख ५१ हजार रुपैयाँ पुरस्कार पक्का गर्नेछ । रुस्लान आठौं गोल्ड कपको विजेताले उपाधिसहित ५ लाख ५१ हजार रुपैयाँ प्राप्त गर्नेछ ।