धरान (हाम्रो खेलकुद) — सातौं राष्ट्रिय खेलकुदको स्वर्ण पदक विजेता नेपाल एपिएफ क्लब र सिएमजी क्लब संकटाबीच सोमबार १९ औं बुढासुब्बा रेडबुल गोल्डकप फुटबल प्रतियोगिताको तेस्रो क्वार्टरफाइनल हुँदैछ ।

धरानमै पुसमा राष्ट्रिय खेलकुदमा स्वर्ण पदक जितेयता कुनै पनि प्रतियोगिताको फाइनल पुग्न नसकेको एपिएफले धरानमा सोझै क्वार्टरफाइनलमा मौका पाएको थियो । उता संकटाले भने गत महिना रुस्लान सिमरा गोल्डकपको उपाधि जितेको थियो । यद्दपी टोली उदयपुर गोल्डकपमा भने सेमिफाइनल भन्दा अघि बढ्न सकेन । बुढा सुब्बामा पहिलो खेल जित्दै संकटा अन्तिम आठमा पुगेको थियो । यी दुई ए डिभिजन टोलीबीचको खेल धरान १७ स्थित एन्फा टेक्निकल सेन्टरमा दिउँसो हुनेछ ।

प्रतियोगिताको दोस्रो क्वार्टरफाइनलमा आइतबार कास्की ११ लाई ३–० ले हराउँदै आयोजक धरान फुटबल क्लब निलो सेमिफाइनलमा पुगेको थियो । उदयपुर गोल्डकप च्याम्पियन रुपन्देही ११ पनि यसअघि नै सेमिफाइनल पुगिसकेको छ ।

प्रतियोगिताको विजेताले उपाधि सहित ५ लाख र दोस्रो हुने टोलीले २ लाख ५० हजार रुपैयाँ प्राप्त गर्नेछ । झन्डै ५५ लाख रुपैयाँ खर्च हुने अनुमान गरिएको प्रतियोगिताको सर्वोत्कृष्ट खेलाडीले यामाहा मोटरसाइकल र उच्च गोलकर्ताले २५ हजार रुपैयाँ पाउने क्लबले जनाएको छ । उत्कृष्ट गोलकिपर, उत्कृष्ट डिफेन्स, उत्कृष्ट स्ट्राइकर, उत्कृष्ट मिडफिल्डर र उत्कृष्ट प्रशिक्षक तथा हरेक खेलको म्यान अफ दी म्याचले ५ हजार रुपैयाँ पाउनेछन् ।