चितगोङ (हाम्रो खेलकुद) – लक्ष्मी हुन्डाई मनाङ मस्र्याङ्दी क्लबसँग बंगलादेशमा जारी शेख कमल अन्तर्राष्ट्रिय क्लब कप–२०१७ को समूह चरणको सेमिफाइनल पुग्न शुक्रबार आयोजक चितगोङ अवहनी लिमिटेडसँग धेरै विकल्प छैन।

चितगोङस्थित मोहम्मद अजिज रंगशालामा शुक्रबार हुने समूह चरणको अन्तिम खेलमा मनाङले अन्तिम चार पुग्न मनाङलाई जित्दै पर्ने दबाब छ।  अघिल्लो चरणमा पुग्न चितगोङ अवहनीलाई भने बराबरी पर्याप्त हुन्छ । त्यसले मनाङका प्रशिक्षक छिरिङ लोप्साङ गुरुङले चितगोङ अवहनीसँगको खेल ‘गर या मर’ अवस्थामा रहेको बताउँछन्।

‘सेमिफाइनल पुग्न हामीले जित्नै पर्ने हुन्छ , हामी त्यसरीनै खेल्नेछौं,’ प्रशिक्षक लोप्साङले भने, ‘अरुको नतिजामा निर्भर भएर होइन आफै जितेर हामी अघि बढ्न चाहन्छौं।’अफगानिस्तानको शाहिन अस्मायी लाई ३–१ को नतिजा सुम्पेपछि मनाङको सेमिफाइनल यात्रा कठिन बनेको थियो।

यस्तै कप्तान अनिल गुरुङले चितगोङविरुद्धको खेल फाइनल जस्तै खेल भएको बताए । ‘हामीलाई सेमिफाइनल प्रवेशका लागि निश्चित जितको खाँचो छ। बराबरीले हामी अर्को चरणमा प्रवेश गर्न सक्दैनौ। त्यसैले यो फाइनल खेल नै हो,’ अनिलले भने, ‘उनीहरुलाई घरेलु मैदानको फाइदा छ। उनीहरुलाई बराबरी नै पर्याप्त छ। तर, हामीलाई तीन अंक महत्वपूर्ण छ, हाम्रो प्रयास त्यसकै लागि हुनेछ। ’

पहिलो खेलमा मनाङले मोहमोदेनलाई २–० ले पराजित गर्दा दोस्रो खेलमा मनाङले अफगानिस्तानको शाहिन अस्मायीलाई ३–१ को नतिजा सुम्पेको थियो। समूह ‘बी’ मा रहेको मनाङ ३ अंकसहित अंकतालिकाको तेस्रो स्थानमा छ। आयोजक चितगोङ अवहनी लिमिटेड भने ४ अंकसहित शीर्ष स्थानमा रहँदा मनाङलाई गोलअन्तरमा पछि पार्दै शाहिम अस्मायी दोस्रो तथा मोहमोदेन १ अंकसहित पुछारमा छ।