अस्ट्रेलियामा सनसाइनको जितमा जगजितको गोल

काठमाडौँ (हाम्रो खेलकुद) – नेपाली मिडफिल्डर जगगित श्रेष्ठको अस्ट्रेलियन क्लब सनसाइन जज क्रस फुटबल क्लब भिक्टोरिया नेसनल प्रिमियर लिगमा पुनः विजय लयमा फर्केको छ । लिगको दोस्रो स्थानमा रहेको स्प्रिङभेल डब्लूइलाई शनिबार सनसाइले ३–१ ले हराएको थियो ।

टोलीको जितमा जगजितले एउटा गोल गरे भने अर्को गोलका लागि पास मिलाइदिएका थिए । जगजितले पाँचौं मिनेटमा टोलीका लागि पहिलो गोल गरेका थिए । टोलीले ६४ औं मिनेटमा अर्को गोल गर्यो । खेल सकिन ९ मिनेटअघि तेस्रो गोलमा उनले पास मिलाइदिएका थिए ।

सिजनको छैटौं खेलमा सनसाइनको त्यो तेस्रो जित हो । सुरुआती दुई खेलमा बराबरीमा रोकिएको सनसाइनले त्यसपछि लगातार दुई खेल जितेको थियो । गत साता भने टोली डान्डेनोङ सिटीसँग १–० ले पराजित भएको थियो ।

टोलीले जितेका तीनै खेलमा जगजित गोल गर्न सफल भएका छन् । शनिबारको जितपछि उनको टोलीको अंक ११ पुगेको छ । गत सिजन अर्को क्लबमा आबद्ध जगजित यहि सिजन सनसाइनमा आवद्ध भएका थिए ।