काठमाडौं (हाम्रो खेलकुद)– अमेरिकाको पेन्सेभेनियामा रहेको किस्टोन एथलेटिकले नेपाली क्लबलाई अमेरिका भ्रमणको निमन्त्रणा दिएको छ । युएसए ओपन च्याम्प्यिनसिपमा नेपाली खेलाडीको व्यवस्थापकका रुपमा अमेरिका पुगेका रुस्लान थ्री स्टार क्लबका सदस्य राम श्रेष्ठमार्फत क्लबका पदाधिकारीले नेपाली क्लबलाई किस्टोनले समरमा आयोजना प्रतियोगिता भाग लिन आमन्त्रण गरेको बताइएको छ ।

थ्री स्टारका पूर्व प्रशिक्षक प्रदीप हुमागाई हाल किस्टोन एथलेटिकमा प्रशिक्षकका रुपमा कार्यरत छन् । हुमागाईको पहलमा श्रेष्ठले क्लबका निर्देशक हिसम सोबे र प्रशिक्षक निर्देशक टोम मुस्टाकसँग भेट गरेका थिए । उनीहरुले आफुहरु नेपाली क्लबलाई सहयोग गर्न तयार रहेको बताएको श्रेष्ठले टेलिफोनमार्फत हाम्रो खेलकुदलाई जानकारी दिए ।

श्रेष्ठले अमेरिका आमन्त्रणको निमन्त्रणा दिएपनि अहिले नै सहभागि हुने नहुने वा कसरी हुने भन्ने विषयमा केही बताउन नसकिने जनाए। ‘ प्रारम्भिक कुराकानी भएको छ ’ श्रेष्ठले भने, ‘हामीले भाग लिन सक्ने नसक्ने विषयमा अहिले जवाफ दिन सक्दैनौं । नेपाल फर्केर यो विषयमा छलफल अघि बढाउछु । त्यसपछि मात्र भाग लिने नलिने कुरा अघि बढ्नेछ । ’

हुमागाई लगायत अन्य थ्रुपै प्रशिक्षक रहेको क्लबमा नेपाली राष्ट्रिय टोलीका पूर्व प्रशिक्षक रिचर्ड ओर्लोस्की टेक्निकल डाइरेक्टरका रुपमा कार्यरत छन् । हुमागाई केही बर्षयता अमेरिका बस्दै आएका छन् । हुमागाईले अहिले किस्टोनमा यू १४ र यू १८ लाई प्रशिक्षण दिदै आइरहेका छन् ।

अमेरिका जानुअघि हुमागाईको प्रशिक्षणमा थ्री स्टारले सहिद स्मारक ए डिभिजन लिगको उपाधि जितेको थियो । त्यति बेला श्रेष्ठ थ्री स्टारको व्यवस्थापक थिए ।