काठमाडौं (हाम्रो खेलकुद) – विभागीय नेपाल पुलिस क्लब समूह विजेताको रुपमा दोस्रो ललित स्मृति यु–१८ फुटबल प्रतियोगिताको क्वार्टरफाइनलमा प्रवेश गरेको छ । संकटा भने समूह उपविजेताको रुपमा अन्तिम आठमा प्रवेश गर्यो । सातदोबाटोस्थित एन्फा कम्प्लेकसको खेल मैदानमा सोमबार भएको खेलमा संकटालाई २–१ ले पराजित गर्दै पुलिस समूह ‘डी’ विजेता बनेको हो ।

समूहमा पुलिसले सात अंक जोड्यो भने संकटा ६ अंकमा रोकियो । प्रतिस्पर्धात्मक बनेको खेलमा पुलिसले १० औं मिनेटमा रेजिन सुब्बाको गोलबाट अग्रता लिएको थियो । २९ औं मिनेटमा रेवस मास्कले पुलिसको अग्रता दोब्बर बनायो । पहिलो हाफको इन्जुरी समयमा संकटाका दिपेश आलेमगरले गोल गर्दै संकटालाई खेलमा फर्काउने प्रयास गरेका थिए । तर, दोस्रो हाफमा गोल गर्न नसक्दा संकटाले पुलिसलाई २–१ को नतिजा सुम्पियो ।

यस्तै सोमबारै भएको अर्काे खेलमा समूहमा शीर्ष स्थानमा रहेका जगदम्बा लुम्बिनी फुटबल क्लबलाई ४–० ले पराजित गर्दै समूह ‘सी’ को विजेता बन्दै क्वार्टफाइनलमा पुग्न सफल भएको छ । जावलाखेलले लुम्बिनी र शेर्पालाई गोल अन्तरमा पछि पार्दै समूहमा शीर्ष स्थानमा रहँदै अन्तिम आठमा पुग्न सफल भएको हो । जावलाखेलको जितमा सुशान्त चौधरीले ह्याट्रिक पुरा गर्दा अमित बोम्जन लामाले एक गोल थपेका थिए । अमित बोम्जनको गोलबाट जावलाखेलले १४ औं मिनेटमा अग्रता लिएको थियो । त्यसपछि तीनै गोल सुशान्त चौधरीले गरे । उनले खेलको २६, ७५ र इन्जुरी समयमा गरे । यस समूहबाट दोस्रो टिमको टुङ्गो लाग्न सकेको छैन ।

यस समूहबाट हिमालयन शेर्पाको अघिल्लो चरण पुग्ने सम्भावना छ । एनआरटीविरुद्धको खेल जिते शेर्पाले गोलअन्तरमा लुम्बिनीलाई पछि पार्दै क्वार्टरफाइनलमा प्रवेश गर्नेछ ।

प्रतियोगिता अन्तर्गत मंगलबार सरस्वती र च्यासल तथा मनाङ र सुदुरपश्चिमबीच खेल हुनेछ ।