अर्जुन कार्की
बागलुङ – चिल्ड्रेन  लाइफ स्पोर्टस् क्लब र रुद्रेपिपल युवा क्लब बागलुङ जिल्ला लिग फुटबल प्रतियोगिताको सेमिफाइनलमा पुगेका छन् । चिल्ड्रने लाइफ विजेता र रुद्रेपिपल उपविजेताका समूह ‘क’ बाट अन्तिम चारमा पुगेका हुन् । जिल्लाको बाङ्गेचौर खेलमैदानमा शुक्रबार भएको समुह ‘क’ को अन्तिम खेलमा रुद्रेपिपलले बागलुङ खेलकुद क्लबलाई ४–२ ले हराउँदै सेमिफाइनल पुग्न सफल भएको हो ।

शुक्रबारको खेल दुवै टोलकिा लागि गर या मरको अवस्थामा थियो । पहिलो आफ २–२ गोलको बराबरी टुंगिएपनि दोस्रो हाफमा रुद्रेपिपल हावि भएको थियो र २ गोल थपेको थियो । अखिल नेपाल फुटबल संघ (एन्फा) को बार्षिक कार्यक्रम अनुसार बागलुङ जिल्ला फुटबल संघले आयोजना गरेको प्रतियोगितामा लिग विजेताले उपाधिसहित ५० हजार र दोस्रो हुने टोलीले २५ हजार रुपैयाँ प्राप्त गर्नेछन् ।

त्यस्तै प्रतियोगितामा सर्वोत्कृष्ट खेलाडी र अनुशासित टिमले २–२ हजार प्राप्त गर्नेछन् । उत्कृष्ट गोलकिपर, रक्षक, मिडफिल्ड, स्ट्राइकर र उच्च गोलकर्ताले समान १ हजार रुपैयाँ प्राप्त गर्ने संघले जनाएको छ ।

यस्तै शुक्रबार हुने भनिएको समुह ‘ख’ अन्तर्गत फ्युचर ब्राईटर स्पोर्टस् र रस आवर फुटसल तथा मुलपानी खेलकुद विकास समिति र पावर फिटनेस क्लबबीच तय भएको खेल बर्षाका कारण स्थगित भएको थियो । उक्त खेल शनिबार हुने जिल्ला फुटबल संघका महासचिव जय राजभण्डारीले जानकारी दिए ।