लन्डन (एजेन्सी)– गत सिजन म्यानचेस्टर युनाइटेडका उच्च गोलकर्ता रहेका स्विडिस स्ट्राइकर ज्लाटान इब्राहिमोभिचलाई रिलिज गरेको छ । युनाइटेडसँग इब्राहिमोभिचको एक बर्षे सम्झौता जुन ३० मा समाप्त हुँदैछ । क्लबले चाहेको खण्डमा इब्रासँगको अनुबन्धन १ वर्ष थपिने प्रावधान भएपनि क्लबले उनलाई रिलिज गरेको हो। यसबाहेक दुई पक्षको सहमतिमा स्विडिस स्ट्राइकरसँग क्लबले अर्को एक बर्षको सम्झौता गर्ने चर्चाको बीच उनी सन् २०१८ मा मात्र मैदान फर्कने भएकाले सम्भावना टरेको बताइएको छ । घुँडाको शल्यक्रियापछि इब्राहिमोभिच आराम गरिरहेका छन् ।

गत बर्ष युनाइटेडमा आबद्ध भएयता उनले उच्च प्रदर्शन गरेका थिए । पेरिस सेन्ट जर्मेनबाट गत बर्ष युनाइटेडमा आबद्ध भएपछि उनले ४१ खेलमा २८ गोल गरेका थिए । ३५ बर्षे स्ट्राइकरका एन्जेन्ट मिनो रायोलाले उनको क्लबसँग अर्को एक बर्ष सम्झौता हुन सक्ने बताएका थिए ।

तर, क्लबले इब्राहिमोभिचको सम्झौता बढाउने भन्दा रियल म्याड्रिडका अल्भारो मोराटालाई भित्राउने प्रयास बढाएको छ । यद्दपी मोराटासँगको सम्झौता प्रक्रिया अझै टुंगिएको छैन । युनाइटेड उनीसँगको सम्झौता हुनेमा आशावादी छ । रियलले मोराटाका लागि ९० मिलियन युरो भन्दा बढीको माग राखेको छ ।

युनाइटेडले मोराटाका लागि ६० मिलियन युरोको प्रस्तावलाई रियलले अस्वीकार गरेको छ । यसैबीच, बुन्डेसलिगा टोली हेराथ बर्लिनले इब्राहिमोभिचसँग सम्झौता गर्न चाहेको बताएको छ ।