नयाँ हेयरस्टाइलमा हँसमुख रोनाल्डो

एजेन्सी – शनिबारबाट सुरु हुने कन्फेडेरेसन कपको तयारीमा जुटेको पोर्चुगल टोलीका कप्तान क्रिस्टियानो रोनाल्डो विविध समस्याका बावजुद प्रशिक्षणका क्रममा नयाँ लुक्समा हाँसखेल गर्दै गरेका भेटिए।

कर छलीको आरोप लागेको रोनाल्डो भर्खरै जुम्ल्याहा सन्तानको बाबु बनेको हल्ला मैदान बाहिर यावत छन्। त्यसमाथि पोर्चुगल कन्फेडेरेसन कपमा सहभागी जनाएसँगै उनलाई उपाधि जिताउने दबाव थपिएको छ। ३२ वर्षीय रोनाल्डोले प्रशिक्षणमा भने आफूमाथि कुनै दबाव नरहेको संकेत दिंदै हाँसखेल गर्दै बिताए।

उनले एकपटक त क्यामेरातर्फ फर्कंदै गर्दै चुप लाग्ने इशारा पनि गरे। त्यसको केहि क्षणमै उनले फोटो पत्रकारहरुसँग जिस्किंदै फोटोको लागि छुट्टै पोज पनि दिए।

नयाँ हेयरस्टाइलमा देखिएका रोनाल्डो पोर्चुगलसँग फिफा कन्फेडेरेसन कप जितेर नयाँ अध्याय लेख्ने धुनमा छन्। पोर्चुगलसँगै जर्मनी र चिलीलाई पनि यस प्रतियोगिताको दाबेदारको रुपमा हेरिएको छ। पोर्चुगलले आफ्नो पहिलो खेल मेक्सिकोविरुद्ध आइतबार खेल्दैछ।