एजेन्सी – बार्सिलोना एवं युभेन्टसका पूर्व खेलाडी ड्यानी आल्भेसले म्यानचेस्टर सिटीको प्रस्ताबलाई नकार्दै फ्रान्सेली टोली पेरिस सेन्ट जर्मन (पिएसजी) सँग २ वर्षको सम्झौता गरेका छन्। सिटिले आल्भेससँग सहमति गरेर फर्केपनि पिएसजीले सिटीले दिएको भन्दा दोब्बर धेरै तलब दिने भएपछि सिटी पछि हटेको थियो।

युभेन्टसबाट अनुबन्धन समाप्त भएसँगै फ्री एजेन्ट रहेका आल्भेसले २ वर्षको सम्झौता बापत २५ मिलियन पाउण्ड बराबरको तलब लिनेछन्। यो सिटीले प्रस्ताब गरेको १ लाख २५ हजार पाउण्ड प्रतिसाता भन्दा दोब्बर रकम हो। ३४ वर्षीय डिफेन्डर आल्भेसलाई बुधबार एक कार्यक्रमबीच मिडिया र समर्थकसामु प्रस्तुत गरिने भएको छ।

यसअघि म्यानचेस्टर सिटी र प्रशिक्षक पेप गुआर्डीओलाले आल्भेससँग भेटेर सहमति जनाएपनि अन्तिम समयमा पिएसजीको मोटो रकमको सम्झौतामा आल्भेसले हस्ताक्षर गर्न राजी भए। पछिल्लो पटक बार्सिलोनामा सँगै काम गरेका आल्भेस र गुआर्डीओलाबीच यस घटनाले चिसोपना बढ्ने पक्का छ।

आल्भेसले नकारेसँगै सिटीले अब आफ्नो ध्यान अन्य खेलाडीतर्फ मोडेको छ। उसले टोटेनहम हट्स्परका काइल वाल्करलाई आफ्नो मुख्य दाबेदारको रुपमा हेर्दै आएको छ। यद्दपी वाल्करलाई भित्र्याउन भने सिटीले मोटो रकम तिर्नुपर्ने हुन्छ।

सिटीले यसै सिजन २ नयाँ खेलाडीलाई भित्र्याइसकेको छ। पोर्चुगलका मिडफिल्डर बर्नार्डो सिल्भा र ब्राजिलका गोलरक्षक एडरसनले गत सिजनको अन्त्यसँगै सिटि आउने पक्का गरेका थिए।